فیصل آباد نشئی باپ نے4ماہ کا بیٹا زمین پر پٹخ کر مار ڈالا سیالکوٹ خاوند نے بیوی اور2بچے قتل کر دئیے

وحیدکابیوی سے نشہ کرنے،پیسوں پر جھگڑا رہتا تھا، دوسرابیٹاشدیدزخمی۔ فائل فوٹو

---

فیصل آباد کے علاقے جج والا میں بیوی سے جھگڑے پرباپ نے 4 ماہ کے معصوم بیٹے محسن کوزمین پر پٹخ کرہلاک اور چارسالہ بیٹے ادیب کو شدید زخمی کردیاجسے الائیڈ اسپتال میں داخل کر دیا گیا ہے، محلہ داروں نے ملزم وحیدمسیح کو پکڑکرپولیس کے حوالے کردیا،جھنگ بازار پولیس نے ملزم وحیدکے والد صدیق مسیح کے بیان پراس کے خلاف قتل اور اقدام قتل کا مقدمہ درج کر لیا،

بتایا جاتا ہے کہ وحید مسیح کا نشہ کرنے اور پیسوںکے تقاضا پرگھر میں جھگڑا رہتا تھا ۔ادھرسیالکوٹ کے علاقے سمبڑیال میں شوہرنے بیوی اور 2 بچوں کو قتل کردیا ، بتایا گیا ہے کہ احمد فراز بٹ عرف مون نے بے روزگار ی سے تنگ آ کر گھریلو ناچاقی کے باعث اپنی بیوی حفصہ شاداب، دو سالہ بیٹے محمد احمد اور 4 سالہ بیٹی فاطمہ کو مبینہ طور پر زہر دے کر ہلاک کر دیا اور مکان کو تالہ لگا کر فرار ہوگیا ۔

بتایا گیا ہے کہ احمد فراز بٹ اپنے دادا کے مکان میں اپنے والد سے علیحدہ اپنی فیملی کے ساتھ رہائش پذیر تھا، مقتولہ حفصہ کے بھائی عامر ذیشان کے مطابق کہ ہم اپنی بہن سے رابطہ کر رہے تھے رابطہ نہ ہونے پر قلعہ کالر والا سے سمبڑیال آکر دیکھا کہ مکان کو تالہ لگا ہوا تھا۔ پڑوس کے گھر سے اندر داخل ہوئے اور دیکھا کہ کمرے میں تینوں کی لاشیں پڑی تھیں،مقامی پولیس نے احمد فراز بٹ اور اس کے والد مزمل بٹ کیخلاف مقدمہ درج کر لیاہے۔