سلمان خان پہلی بار بیک وقت ہیرو اور ولن کے روپ میں نظر آئیں گے

بالی ووڈ اداکار شاہ رخ خان، اکشے کمار اور رشی کپور بھی فلموں میں بیک وقت 2 کرداروں میں جلوہ گر ہوئے ہیں، فوٹو:فائل

---

بالی ووڈ کے دبنگ سپر اسٹار سلمان خان فلم ''کک'' کے سیکوئل میں ڈبل رول میں نظر آئیں گے جس میں وہ پہلی بار ہیرو اور ولن کا کردار ادا کریں گے۔

بالی ووڈ فلموں میں ایک ہیرو کے لئے ڈبل رول کرنا کوئی نئی بات نہیں جب کہ شاہ رخ، سلمان خان، اکشے کمار اور رشی کپور سمیت کئی اداکار متعدد فلموں میں ڈبل کردار نبھا چکے ہیں تاہم فلم ''کرن ارجن'' اور ''جڑوا'' کے بعد اب دبنگ خان ایک بار پھر فلم'' کک''کے سیکوئل میں ڈبل کردار میں نظرآئیں گے۔

بالی ووڈ اسٹار سلمان خان نے اپنے انٹرویو میں فلم ''کک'' کے سیکوئل میں جلوہ گر ہونے کی تصدیق کرتے ہوئے ولن کا کردار ادا کرنے کی خواہش کا اظہار کیا تھا تاہم ان کی یہ خواہش فلم ''کک 2'' میں پوری ہونے والی ہے۔ میڈیا رپورٹس کے مطابق سلمان خان پہلی بار فلم''کک'' کے سیکوئل میں بیک وقت ولن اور ہیرو کے روپ میں نظر آئیں گے جب کہ وہ فلم میں بیک وقت ہیرو اور ولن کا کردار نبھانے کے لیے بے تاب ہیں۔

واضح رہے کہ بالی ووڈ اداکار شاہ رخ خان، اکشے کمار اور رشی کپور بھی فلموں میں بیک وقت 2 کرداروں میں جلوہ گر ہوئے ہیں۔