دبنگ خان نے کنگ خان کوبالی ووڈ کا ’’رئیس‘‘ قرار دے دیا

شاہ رخ خان مجھ سے بھی زیادہ فلموں میں کام کرنے کا معاوضہ لیتے ہیں،بالی ووڈ اسٹار سلمان خان، فوٹو:فائل

---

بالی ووڈ کے دبنگ سپر اسٹار سلمان خان نے اعتراف کیا ہےکہ شاہ رخ خان فلموں میں ان سے بھی زیادہ معاضہ لیتے ہیں اور وہ فلمی دنیا کے رئیس ہیں۔

بالی ووڈ کے 2 حکمراں خانز شاہ رخ اور سلمان خان ماضی میں ایک دوسرے کا نام سننا بھی گوارہ نہیں کرتے تھے تاہم اب دونوں اداکاروں کی دوستی وقت کے ساتھ ساتھ گہری ہوتی جارہی ہے جس کا برملا اظہار دونوں ہی مختلف تقریبات میں کرتے نظر آتے ہیں۔

انٹرنیشنل میگزین کی جانب سے جاری ہونے والی زیادہ معاوضہ لینے والے اداکاروں کی فہرست سے متعلق صحافی کے سوال پرسلمان خان کا کہنا تھا کہ فلموں میں کام کا معاوضہ زیادہ نہیں لیتا بلکہ شاہ رخ خان مجھ سے بھی زیادہ معاوضہ لیتے ہیں اور وہ فلمی دنیا کے رئیس ہیں۔

واضح رہے کہ گزشتہ دنوں فوربز میگزین کی جانب سے دنیا کے سب سے زیادہ معاوضہ لینے والے اداکاروں کی فہرست جاری ہوئی تھی جس کے مطابق امیتابھ بچن اور سلمان خان 7 ویں نمبر پر جب کہ اکشے کمار9ویں اور شاہ رخ خان 18ویں نمبر پر تھے۔