بچوں کے تحفظ کے قوانین مزید سخت کرنے کےلیے بل پارلیمنٹ کو ارسال

بل کی منظوری کی صورت میں پاکستان میں بچوں کی بلوغت کی قانونی عمر18سال ہوجائےگی جواس وقت مروجہ قانون کےتحت16سال مقرر ہے

Ghulam Nabi Yousufzai August 15, 2015

بل کی منظوری کی صورت میں پاکستان میں بچوں کی بلوغت کی قانونی عمر 18 سال ہوجائے گی جو اس وقت مروجہ قانون کے تحت16 سال مقرر ہے۔ فوٹو: فائل

وزارت قانون نے بچوں کے تحفظ کیلیے قوانین کو سخت کرنے کی غرض سے متعدد بل پارلیمنٹ کو غور کیلیے بھیج دیے ہیں۔کرمنل لا ترمیمی بل 2015ء کی منظوری کی صورت میں بچوں کی نازیبا تصاویر اور وڈیوبنانا قابل تعزیرجرم بن جائے گا۔

مجوزہ بل کا مسودہ قومی اسمبلی کی قائمہ کمیٹی برائے قانون میں زیر غور ہے جس میں تعزیرات پاکستان اور ضابطہ فوجداری میں ترمیم کرکے بچوں سے متعلق جرائم میں سزائیں مزید سخت کی گئی ہیں۔مجوزہ بل میں بچوںکے بارے میں قوانین کواقوام متحدہ کے کنونشن (یو این سی آر سی) سے ہم آہنگ کیا گیا ہے۔بل کی منظوری کی صورت میں پاکستان میں بچوں کی بلوغت کی قانونی عمر 18 سال ہوجائے گی جو اس وقت مروجہ قانون کے تحت16 سال مقرر ہے۔مجوزہ قانون میں بچوںکی اسمگلنگ اور ان سے جسمانی مشقت لینے کو روکنے کیلیے بھی اقدامات کیے گئے ہیں جبکہ child abuseکی تعریف کا دائرہ مزید وسیع کردیا گیا ہے۔نیشنل کمیشن آن چائلڈ رائٹس کے نام سے ایک اور بل بھی منظوری کیلیے پارلیمنٹ کو بھیجا گیا ہے جس میں بچوںکے تحفظ کیلیے ایک آزادکمیشن بنانے کی سفارش کی گئی ہے، اس کمیشن میں قانون دانوں کے علاوہ حقوق انسانی کیلیے کام کرنے والی غیر سرکاری تنظیموںکے نمائندوںکو بھی شامل کرنے کی تجویز ہے۔