ود ہولڈنگ ٹیکس سے بینک مشکل میں پڑ گئے ایک ماہ میں ڈپازٹ194ارب روپے کم

جون 2015کے مقابلے میں جولائی 2015کے دوران مجموعی بینک ڈپازٹس 194ارب روپے تک کم ہوئے ہیں، اسٹیٹ بینک آف پاکستان

Kashif Hussain August 20, 2015

تنخواہ دار طبقے نے اپنے کھاتوں میں رکھی رقوم میں سے ایک ماہ کے دوران 19 ارب روپے نکلوالیے۔ فوٹو: فائل

ISLAMABAD: بینکوں سے رقوم نکلوانے پر ودہولڈنگ ٹیکس کے نفاز نے پاکستان کی بینکنگ انڈسٹری کو مشکلات سے دوچار کردیا ہے، ایک ماہ کے دوران بینکوں کے مجموعی ڈپازٹس میں 194ارب روپے کی کمی واقع ہوئی ہے۔

نجی کاروباری شعبے کے ذرائع نے بتایا کہ کاروباری طبقہ کی جانب سے نہ صرف بینکوں میں رقوم جمع کرانے کا رجحان کم ہورہا ہے بلکہ بینکوں کے ذریعے لین دین کے بجائے نقد، بانڈز اور وعدے کی رسیدوں کے ذریعے کام چلایا جارہا ہے جن کی وجہ سے بینکوں کے ڈپازٹس میں غیرمعمولی کمی واقع ہوئی ہے۔

اسٹیٹ بینک آف پاکستان کے اعدادوشمار کے مطابق جون 2015کے مقابلے میں جولائی 2015کے دوران مجموعی بینک ڈپازٹس 194ارب روپے تک کم ہوئے ہیں جون کے اختتام پر ڈپازٹس کی مجموعی مالیت 9153ارب روپے تھی جو جولائی کے اختتام پر 8959ارب روپے کی سطح پر آچکی ہے۔

اعدادوشمار کے مطابق نجی کاروبار کرنے والوں نے ایک ماہ کے دوران بینک اکاؤنٹس سے 132ارب روپے کی رقوم نکلوالیں، جون کے اختتام پر پرائیوٹ بزنس ڈپازٹ کی مالیت 2511ارب روپے تھی جو جولائی کے اختتام پر 2379ارب روپے کی سطح پر آگئی، اس طرح ایک ماہ کے دوران نجی کاروبار کے بینک ڈپازٹس 5.25فیصد تک کم ہوگئے۔

تعمیرات کے شعبے میں سرمائے کی ریل پیل، وصولیوں اور ادائیگیوں کے لیے بینک کھاتوں کے زیادہ استعمال کی وجہ سے رقوم نکلوانے کا رجحان بھی زیادہ رہا، تعمیرات کے شعبے میں بینک ڈپازٹس ایک ماہ کے دوران 33ارب روپے کم ہو گئے، بلڈنگ کی تعمیرات کے سلسلے میں کھولے گئے اکاؤنٹس سے ایک ماہ کے دوران 24ارب روپے، انفرااسٹرکچر کی تعمیر کے سلسلے میں کھولے گئے اکاؤنٹس سے ایک ماہ میں 8.47ارب روپے نکالے گئے۔

مقامی تھوک کاروباری طبقے نے بینک اکاؤنٹس سے ایک ماہ میں 4.89ارب روپے نکالے جبکہ ریٹیل سیکٹر نے بینک کھاتوں سے 11ارب روپے کی رقوم نکلوالیں۔ ودہولڈنگ ٹیکس کٹوتیوں نے کاروباری طبقے کے ساتھ انفرادی اکاؤنٹس سے بھی رقوم نکلوانے کا سلسلہ جاری ہے، جولائی کے مہینے میں انفرادی کھاتے داروں نے بھی اپنے کھاتوں سے 109ارب روپے کی رقوم نکلوالیے اور انفرادی کھاتے داروں کے مجموعی ڈپازٹس 4628ارب روپے سے کم ہوکر 4519ارب روپے کی سطح پر آ گئے۔

تنخواہ دار طبقے نے اپنے کھاتوں میں رکھی رقوم میں سے ایک ماہ کے دوران 19 ارب روپے نکلوالیے، سیلف ایمپلائڈ افراد نے اپنے کھاتوں سے 34ارب روپے نکلوائے جبکہ گھریلو خواتین، طلبہ اور دیگر متفرق انفرادی کھاتے داروں نے اپنے اکاؤنٹس سے 57ارب روپے نکلوالیے۔