ملک میں جمہوریت کے نام پر بدترین آمریت نافذ کردی گئی ہے ڈاکٹر فاروق ستار

اسلام آباد میں نئی ایم کیوایم بنانے کا شوشہ چھوڑا گیا جو بھی مائنس ون کی بات کرے گا اس کی مخالفت کریں گے، رہنما متحدہ

ویب ڈیسک August 21, 2015

اسلام آباد میں نئی ایم کیوایم بنانے کا شوشہ چھوڑا گیا جو بھی مائنس ون کی بات کرے گا اس کی مخالفت کریں گے، رہنما متحدہ، فوٹو:ایکسپریس نیوز

MUMBAI: ایم کیوایم کے رہنما ڈاکٹر فاروق ستار کا کہنا ہےکہ اس وقت ملک میں جمہوریت کے نام پر بدترین آمریت نافذ کردی گئی ہے کیونکہ اظہار رائے اور اظہار خیال کی آزادی پر بھی پابندی لگائی جارہی ہے۔

کراچی میں پریس کلب کےباہر ایم کیوایم کی جانب سے احتجاجی ریلی نکالی گئی جس سے خطاب کرتے ہوئے ڈاکٹر فاروق ستار نےکہا کہ اس وقت ملک میں جمہوریت کےنام پر بدترین آمریت نافذ کردی گئی ہے کیونکہ اظہار رائے اور اظہار خیال کی آزادی پر بھی پابندی لگائی جارہی ہے اور اختلاف رائے کا گلا گھونٹا جارہا ہے۔ انہوں نے کہا کہ اسلام آباد میں نئی ایم کیوایم بنانے کا شوشہ چھوڑا گیا ، جو بھی مائنس ون کی بات کرے گا اس کی مخالفت کریں گے جب کہ الطاف حسین مفاہمت کی پالیسی پر عمل پیرا ہیں۔

فاروق ستار کا کہنا تھا کہ کراچی ملکی معیشت کا سب سے بڑا حصہ اور شہہ رگ ہے یہاں انسانی اور آئینی حقوق کو پامال کیا جارہا ہے، ہم نے کبھی بھی آپریشن بند کرنے کا مطالبہ نہیں کیا جب کہ ہمارا مؤقف رہا ہے کہ آپریشن کیا جائے مگر ناجائز طور پر دباؤ نہ ڈالا جائے اور سیاسی مسائل کو سیاسی طور پر ہی حل کرنا چاہئے۔