حکومت اور ایم کیوایم کے مذاکرات کامیاب متحدہ کی شکایات کے ازالے کیلیے کمیٹی کی تشکیل پر اتفاق

کمیٹی اپنے قیام کے فوری بعد کام شروع کردے گی جب کہ کمیٹی کے قیام کے بعد ایم کیوایم اپنے استعفے واپس لے گی، فوٹو:فائل

---

حکومت اور متحدہ قومی موومنٹ کے درمیان مذاکرات میں اہم پیشرفت ہوئی ہے جس میں متحدہ کی شکایات کے ازالے کےلیے ازالہ کمیٹی کی تشکیل پر اتفاق ہوا ہے۔



ایکسپریس نیوز کےمطابق اسلام آباد کے پنجاب ہاؤس میں ہونے والے مذاکرات میں ایم کیوایم کی جانب سے ڈاکٹر فاروق ستار، بیرسٹرسیف، شبیر قائم خان، کنور نوید جمیل اور وسیم اختر شامل تھے جب کہ حکومتی وفد میں وزیر اطلاعات پرویز رشید اور وزیراعظم کے قانونی مشر اشتراوصاف پر مشتمل تھا۔



ذرائع کےمطابق حکومت اور ایم کیوایم کےدرمیان مذاکرات میں اہم پیش رفت سامنے آئی ہے جس میں ایم کیوایم کے استعفوں کی واپسی اور کراچی آپریشن پر شکایات کے الزالہ کرنے سے متعلق کمیٹی کی تشکیل پر اتفاق ہوگیا ہے۔ ذرائع کا کہنا ہےکہ ایم کیوایم کی شکایات کا ازالہ کرنے کے لیے قائم کمیٹی کے ارکان آزاد ہوں گے جس میں سابق جج اور ٹیکنو کریٹس کو بھی شامل کرنے کی تجویز دی گئی ہے جب کہ کمیٹی کے اختیارات اور قانونی حیثیت پر بات دوسرے دور میں ہوگی۔



ذرائع نے بتایا کہ کمیٹی اپنے قیام کے فوری بعد کام شروع کردے گی جب کہ کمیٹی کے قیام کے بعد ایم کیوایم اپنے استعفے واپس لے گی جس کے لیے قانونی راستہ اختیار کیا جائے گا۔ ذرائع کا کہنا تھا کہ ازالہ کمیٹی کی تشکیل کے لیے ڈرافٹ وزیراعظم کو جلد بھجوایا جائے گا جب کہ ایم کیوایم کے ارکان کی الطاف حسین سے حتمی مشاورت کے بعد متحدہ قومی موومنٹ کے ارکان اسمبلیوں اور سینیٹ سے استعفوں کی نا منظوری کی درخواست کریں گے۔

واضح رہےکہ ایم کیو ایم کے ارکان نے کراچی آپریشن پر تحفظات کا اظہار کرتے ہوئے قومی و صوبائی اسمبلی سمیت سینیٹ سے استعفے دے دیئے تھے جس کے بعد وزیراعظم نے مولانا فضل الرحمان کو ایم کیوایم سے مذاکرات کا ٹاسک دیا تھا جس کا پہلا دور نائن زیرو پر ہوا۔