فواد خان بالی ووڈ میں اداکاری کے بعد اب اپنی آواز کا جادو جگائیں گے

فلم’’کپور اینڈ سنز‘‘ میں فواد خان کے گانے کی ریکارڈنگ اور شوٹنگ اگلے ماہ کی جائے گی

ویب ڈیسک August 29, 2015

اداکار فواد خان نے اداکارہ سونم کپور کے ہمراہ 2014 میں ریلیز ہونے والی فلم ’’خوبصورت‘‘ سے بالی ووڈ میں قدم رکھا تھا، فوٹو:فائل

بالی ووڈ میں کامیابی کے جھنڈے گاڑنے والے پاکستانی اداکار فواد خان فلم''کپور اینڈ سنز'' میں اداکاری کے ساتھ ساتھ گلوکاری کریں گے۔

پاکستانی ادکار فواد خان نے بالی ووڈ میں اپنے فنی کیرئیر کا سفر 2014 میں ریلیز ہونے والی فلم ''خوبصورت'' سے کیا جب کہ فلم میں فواد خان کی اداکاری کو نہ صرف بے حد پسند کیا گیا بلکہ انہیں متعدد فلموں میں کام کرنے کی پیشکش بھی کی گئی تاہم وہ فلموں کے انتخاب میں احتیاط برت رہے ہیں۔

میڈیا رپورٹس کے مطابق اداکار فواد خان نامور فلمساز کرن جوہر کی فلم ''کپور اینڈ سنز'' میں مرکزی کردار ادا کر رہے ہیں جب کہ پاکستانی اداکار فلم میں اداکاری کے ساتھ ساتھ اپنی آواز کا جادو بھی جگائیں گے تاہم گانے کی ریکارڈنگ اور شوٹنگ اگلے ماہ کی جائے گی۔

واضح رہے کہ فلم''کپور اینڈ سنز'' میں لیجنڈ اداکار رشی کپور،فواد خان، سدھارت ملہوترا اور اداکارہ عالیہ بھٹ بھی مرکزی کردار ادا کررہے ہیں۔