ورکنگ باؤنڈری کا دورہ انتظامیہ نے وزیر دفاع کو ’ماموں‘ بنادیا

خواجہ آصف کے روانہ ہوتے ہی حکومت کی جانب سے لگائے جانے والے ریلیف کیمپ اکھا ڑ دیئے گئے۔

کلیم رؤف چشتی August 31, 2015

خواجہ آصف کے روانہ ہوتے ہی حکومت کی جانب سے لگائے جانے والے ریلیف کیمپ اکھا ڑ دیئے گئے۔ فوٹو: فائل

سیالکوٹ انتظامیہ نے وفاقی وزیر دفاع خواجہ آصف کو ''ماموں'' بنا دیا، وفاقی وزیر کے کندن پور سے نکلتے ہی ریلیف کیمپ اکھاڑ لیے گئے۔

وزیر دفاع، پانی و بجلی خواجہ آصف نے اتوار کو بھارتی گولہ باری سے متاثر ہونے والے کندن پور کا دورہ کیا۔ دورے کے دوران انھوں نے متاثرین سے ملاقات کی اور شہدا کے اہل خانہ سے اظہار تعزیت بھی کیا۔ اس دوران انتظامیہ نے ریلیف کیمپوں پر ریونیو کا عملہ تعینات کر دیا اور جیسے ہی وفاقی وزیر دفاع کندن پور سے روانہ ہوئے حکومت کی جانب سے لگائے جانے والے ریلیف کیمپ اکھا ڑ دیے گئے۔ متاثرہ شہری امداد کی امید لے کر آئے لیکن ریلیف کیمپ نہ ہونے پر خالی ہاتھ واپس چلے گئے۔

شہری حلقوں نے اس امر پر افسوس کا اظہار کرتے ہوئے حکام سے اصلاح و احوال کا مطالبہ کیا ہے۔ ایکسپریس کے رابطہ کرنے پر ڈی سی او سیالکوٹ ڈاکٹر آصف طفیل نے بتایا کہ کیمپ اکھاڑے نہیں بلکہ ریلیف کیمپ عارضی لگائے گئے، وفاقی وزیر کے جانے کے بعد ریلیف کیمپوں کا مقصد ختم ہوگیا تھا۔