انڈر ورلڈ ڈان ’’حاجی مستان‘‘ کا کردار صرف اجے دیوگن ہی بخوبی نبھا سکتے ہیں سیف علی خان  

ISLAMABAD:
بالی ووڈ میں چھوٹے نواب کے نام سے مشہور اداکار سیف علی خان نے کہا ہے کہ کسی بھی بڑے گینگسٹر کا کردار ادا کرنا چاہتا ہوں تاہم انڈر ورلڈ کے بے تاج بادشاہ ''حاجی مستان'' کا کردار صرف اجے دیوگن ہی بخوبی نبھے سکتے ہیں۔

بالی ووڈ انڈسٹری اور انڈر ورلڈ کا ماضی میں بڑا گہرا تعلق رہا ہے جب کہ بڑے بڑے اداکاروں پر انڈر ورلڈ سے تعلق کا الزام لگتا رہا ہے جس کے باعث کئی اداکاروں کا فلمی کیرئیر ہی تاریک ہوگیا تاہم اب اسی انڈسٹری میں مافیا سے متعلق فلمیں بننے کا رجحان بڑھتا جارہا ہے جس کی وجہ سے اب ممبئی انڈر ورلڈ پر متعدد فلمیں بھی بن چکی ہیں جن میں ''ونس اپون آ ٹائم ان ممبئی''،''کمپنی''سمیت متعدد فلمیں شامل ہیں۔


بالی ووڈ کے چھوٹے نواب سیف علی خان کا اپنے انٹرویو میں کہنا تھا کہ کسی بھی بڑے گینگسٹر کا کردار ادا کرنا چاہتا ہوں جو میرے لیے انتہائی دلچسپ ہوگا جب کہ انڈر ورلڈ کے بے تاج بادشاہ حاجی مستان کا کردار بہت بڑا اور انتہائی مشکل کردار ہے جسے میں یقینی طور پر نہیں نبھا سکتا تاہم اس کردار کو صرف اجے دیوگن ہی بخوبی سرانجام دے سکتے ہیں۔

واضح رہے کہ بالی ووڈ اداکار اجے دیوگن فلم''کمپنی'' اور '' ونس اپون آ ٹائم ان ممبئی'' میں انڈر ورلڈ ڈان کا کردار ادا کرچکے ہیں۔