چیئرمین ایف بی آر نے نئی آڈٹ پالیسی کی منظوری دیدی

آڈٹ پالیسی کے تحت کمپیوٹرئزاڈ بے ترتیب قرعہ اندازی کے ذریعے ٹیکس دہندگان کو آڈٹ کے لیے منتخب کیا جائے گا

Irshad Ansari September 05, 2015

آڈٹ کے لیے انتخاب کمپیوٹرئزاڈ قرعہ اندازی کے ذریعے کیا جائے گا، دستاویز۔ فوٹو: فائل

چیئرمین فیڈرل بورڈ آف ریونیو (ایف بی آر) طارق باجوہ نے ٹیکس دہندگان کے آڈٹ کے لیے نئی آڈٹ پالیسی 2015 کے مسودے کی منظوری دے دی ہے جسے آئندہ ہفتے ایف بی آر کی بورڈان کونسل میں پیش کیا جائے گا۔

''ایکسپریس'' کو دستیاب مجوزہ آڈٹ پالیسی کے مسودے کے مطابق آڈٹ کا بنیادی مقصد ٹیکس چوری کے خلاف موثر کارروائی کرنا، ٹیکس چوری کے رجحان کو کم سے کم کرنا اور ان خامیوں کی نشاندہی کرکے دور کرنا ہے جو ٹیکس دہندگان کے لیے ٹیکس بچانے کا سبب بنتی ہیں۔

آڈٹ پالیسی کے تحت کمپیوٹرئزاڈ بے ترتیب قرعہ اندازی کے ذریعے ٹیکس دہندگان کو آڈٹ کے لیے منتخب کیا جائے گا اور مانیٹرنگ کے لیے انفارمیشن ٹیکنالوجی کا دوسرا متبادل نظام متعارف کرانے تک آڈٹ کیسز کی مانیٹرنگ ٹیکس آڈٹ مانیٹرنگ سسٹم کے ذریعے کی جائے گی۔ مسودے میں کہا گیاکہ آڈٹ کے دوران جو ٹیکس دہندگان ملکی ٹیکس قوانین کی خلاف ورزی کے مرتکب پائے جائیں گے اورمطلوبہ صلاحیت سے کم ٹیکس ادا کر رہے ہوں گے ان سے نہ صرف ٹیکس واجبات وصول بلکہ جرمانے بھی عائد کیے جائیں گے۔

دستاویز کے مطابق کمپیوٹرائزڈ بے تریب قرعہ اندازی کے علاوہ کمشنرز ان لینڈ ریونیو بھی اپنی حدود میں کم ازکم 5 سے 20 فیصد تک ٹیکس دہندگان کو آڈٹ کے لیے منتخب کریں گے، ان ٹیکس دہندگان کوبذریعہ لیٹر آگاہ کیا جائے گا، ان کے آڈٹ کے لیے انتخاب کی وجوہ بھی بتانا ہوں گی۔ دستاویز کے مطابق ایف بی آر انکم ٹیکس آرڈیننس 2001کی سیکشن 177(11)کے تحت انکم ٹیکس آڈٹ کے لیے اسپیشل آڈٹ پینل تشکیل دے سکے گا۔

اسی طرح سیلز ٹیکس ایکٹ 1990کی سیکشن46 کے تحت سیلز ٹیکس آڈٹ اور ایف ای ڈی ایکٹ 2005کے تحت فیڈرل ایکسائز ڈیوٹی آڈٹ کے لیے بھی اسپیشل پینل تشکیل دیا جا سکے گا۔ دستاویز میں بتایا گیا کہ انکم ٹیکس آڈٹ کے کیسوں کی مانیٹرنگ آئی آر آئی ایس سسٹم اور سیلز ٹیکس اور فیڈرل ایکسائز ڈیوٹی کے آڈٹ کیسوں کی مانیٹرنگ ٹیکس آڈٹ مانیٹرنگ سسٹم(ٹی اے ایم ایس)کے ذریعے ہوگی، ٹیکس دہندگان کو آڈٹ کے لیے تمام نوٹس اور لیٹرز و احکام مخصوص بارڈ کوڈ کے ساتھ جاری کیے جائیں گے۔

دوسری صورت میں ان کی کوئی قانونی حیثیت نہیں ہوگی۔ ذرائع کے مطابق ایف بی آر کی بورڈ ان کونسل کی جانب سے آئندہ ہفتے نئی آڈٹ پالیسی کی منظوری کے بعد کمپیوٹرائزڈ بے ترتیب قرعہ اندازی کی جائے گی جس میں ڈیڑھ لاکھ سے زائد ٹیکس دہندگان کو آڈٹ کے لیے منتخب کیا جائے گا۔