افغانستان میں اونٹ بھی امریکی فوجی کو برداشت نہ کرسکا

فوجی نے جب اونٹ کو چھونے کی کوشش کی تو اسے ایسی زور کی لات پڑی کہ وہ بھاگنے پر مجبور ہوگیا۔

---

یوں تو افغانستان کے عوام چاہتے ہیں کہ امریکیوں سمیت تمام غیر ملکی فوجیں ان کی سرزمین خالی کردیں اور انہیں اپنی مرضی کی زندگی جینے دیں لیکن اب جانوروں نے بھی اپنی اس خواہش کا اظہار کردیا ہے اور ایک اونٹ نے امریکی فوجی کو ایسی زوردار لات ماری کہ اسے دوڑنے پر مجبور کردیا۔

کسی نے سچ ہی کہا ہے کہ اونٹ کو کوئی تنگ کرے گا یا اس کی مرضی کے خلاف چھونے کی کوشش کرے گا تو وہ بہت کرارا جواب دے گا، ایسا کچھ ہوا افغانستان میں امریکی فوجی کے ساتھ جس نے اونٹ کو چھیڑنے کے لیے اس کی مرضی کے خلاف ہاتھ لگانے کی کوشش کی جو اسے بہت مہنگی پڑی اور اونٹ کے جوابی حملے میں فوجی کو ایسی زور کی لات پڑی کہ وہ اونٹ سے کئی فٹ دور بھاگ کھڑا ہوا۔

ویڈیو میں واضح طور پر دیکھا جاسکتا ہے کہ کیمرہ مین نے امریکی فوجی فرینک کو اس حرکت کرنے سے قبل ہی اس کے خطرناک نتائج سے آگاہ کردیا تھا لیکن وہ پھر بھی باز نہیں آیا۔ فرینک نے ایک مقامی شخص کی مدد سے اونٹ کو چھونے کی کوشش کی لیکن شاید اسے امریکی ہاتھ پسند نہ آئے اورجیسے ہی اس نے اونٹ کو ہاتھ لگایا اچانک اونٹ کی سیدھی ٹانگ زور سے فوجی کو پڑی اور وہ دور بھاگ کھڑا ہوا جب کہ اس کے ساتھیوں کے قہقہے پھوٹ پڑے۔