پاکستان اور چین کے فوجی تعلقات ترقی کی نئی بلندیوں تک جائیں گے سربراہ پاک فوج

آرمی چیف نے اسپیشل سروسز گروپ کی دہشت گردی کے خلاف کارکردگی کو سراہا- فوٹو: آئی ایس پی آر

---

پاک فوج كے سربراہ جنرل راحیل شریف نے كہا ہے كہ پاكستان كو دہشت گردی سے مكمل طور پر پاک كیے جانے تك فوجی آپریشنز اسی رفتار اور قوت سے جاری رہیں گے۔

آئی ایس پی آر كے مطابق پاک فوج اور چین كی ''پیپلز لبریشن آرمی'' كی اسپیشل فورسز نے 7 ہفتوں پر محیط ان مشقوں میں حصہ لیا جن كا محور انسداد دہشت گردی آپریشنز تھے جب کہ ان مشقوں كی اختتامی تقریب میں چینی فوج كی نمائندگی جنرل لی فائی نے كی۔





ترجمان پاک فوج کے مطابق اس موقع پر اپنے خطاب میں آرمی چیف جنرل راحیل شریف نے مشقوں میں اعلیٰ سطح كی پیشہ ورانہ مہارت كا مظاہرہ كرنے پر تمام شركا كی تعریف كی اور انہیں مباركباد دی جب کہ ان کا کہنا تھا کہ پاكستان اور چین كے درمیان ایک خصوصی تعلق اور رشتہ قائم ہے، وقت گزرنے كے ساتھ یہ رشتہ مضبوط تر ہوتا گیا ہے اور آنے والے وقتوں میں یہ تعلق مذید اور فقیدالمثال بلندیوں كو چھوئے گا۔





جنرل راحیل شریف نے کہا كہ دہشت گردی اور اس كے تمام مظاہرے مكمل خاتمے كے لیے پاكستان اور چین مل كر كام كرتے رہیں گے۔ پاک فوج کے سربراہ نے اس عزم كو اظہار كیا كہ پاكستان كو دہشت گردی سے پاک كیے جانے تک فوجی آپریشنز اسی رفتار اور قوت سے جاری رہیں گے۔ آرمی چیف نے ''ضرب عضب'' میں بے مثال كاركردگی كا مظاہرہ كرنے پر پاک فوج كے اسپیشل سروسز گروپ كے دستوں كی بھی تعریف كی۔