ہنگری میں داخلے کی کوشش پر پولیس پناہ گزینوں پر ٹوٹ پڑی متعدد افراد زخمی

اقوام متحدہ کے سیکریٹری جنرل نے پناہ گزینوں پر تشدد کی شدید مذمت کی ہے، فوٹو:اے ایف پی

---

ہنگری میں داخل ہونے والے پناہ گزینوں پر پولیس نے آنسو گیس کی شیلنگ اور واٹرکینن سے دھاوا بول دیا جس میں متعدد افراد زخمی ہوگئے جب کہ اقوام متحدہ نے اس ہتک آمیز سلوک کی شدید مذمت کی ہے۔

غیر ملکی خبر رساں ادارے کے مطابق ہنگری کے ہورگوس روزبارڈرپر پناہ گزینوں کی بڑی تعداد نے دھاوا بول دیا اور ہنگری میں داخل ہونے کی کوشش کی جس پر ان کی پولیس سے جھڑپیں شروع ہوگئیں، پولیس نے مظاہرین کو روکنے کے لیے ان پر شدید آنسو گیس کی شیلنگ شروع کردی جب کہ ساتھ ہی واٹر کینن کا بھی استعمال کیا اس دوران متعدد افرد زخمی اور کئی بے ہوش ہوگئے۔

ہنگری پولیس کے مطابق پناہ گزینوں سے جھڑپ میں 14 اہلکار بھی زخمی ہوئے جب کہ ہنگری کے وزیر داخلہ نے پولیس کے ایکشن پر ڈھٹائی کا مظاہرہ کرتے ہوئے کہا کہ پناہ گزینوں نے منع کرنے کے باوجود ملک میں داخل ہونے کی کوشش کی جس پر تمام کارروائی کی گئی۔ ان کا کہنا تھا کہ ہنگری کو اپنی سرحدوں کی حفاظت کرنا ہے خواہ کوئی کتنی بھی تنقید کرے۔

دوسری جانب اقوام متحدہ کے سیکریٹری جنرل بان کی مون نے ہنگری پولیس کے اس بے رحمانہ رویئے پر سخت تنقید کرتے ہوئے کہا کہ انہیں ہنگری پولیس کی جانب سے پناہ گزینوں کے خلاف پرتشدد کے رویئے پر سخت دھچکا لگا کیونکہ وہ لو گ پہلے ہی جنگ اور غم کے ستائے ہوئے ہیں۔