بھارتی ڈپٹی ہائی کمشنر کی دفتر خارجہ طلبی لائن آف کنٹرول کی خلاف ورزی پراحتجاج

بھارت سیز فائر کا احترام کرتے ہوئے اشتعال انگیزی سے گریز کرے، پاکستان - فوٹو:فائل

---

پاکستان نے بھارتی ڈپٹی ہائی کمشنر کو دفتر خارجہ طلب کرکے بھارتی فوج کی جانب سے لائن آف کنٹرول پر بلا اشتعال فائرنگ پر شدید احتجاج کیا۔

دفتر خارجہ کے ترجمان قاضی خلیل اللہ کے مطابق بھارتی ڈپٹی ہائی کمشنر کو دفتر خارجہ طلب کیا گیا اور بھارتی فوج کی جانب سے لائن آف کنٹرول کے نکیال سیکٹر پربلااشتعال فائرنگ کے واقعے پر شدید احتجاج کیا جب کہ نکیال سیکٹر پر فائرنگ سے شہریوں کی شہادت پر ڈی جی ساؤتھ ایشیا اینڈ سارک ڈاکٹر فیصل کی جانب بھارتی ڈپٹی ہائی کمشنر کو احتجاجی مراسلہ بھی دیا گیا۔

احتجاجی مراسلے میں کہا گیا کہ عام شہریوں پربھارت کی بلا اشتعال فائرنگ کی مذمت کرتے ہیں جب کہ بھارت سیز فائر کا احترام کرتے ہوئے اشتعال انگیزی سے گریز کرے۔

واضح رہے گزشتہ روز بھارتی فوج نے سیز فائر کی خلاف ورزی کرتے ہوئے نکیال سیکٹر پر بلا اشتعال فائرنگ اور گولہ باری کی جس سے 2 شہری شہید ہوگئے تھے۔