بڈھ بیر بیس حملے کا مقدمہ درج تحقیقات کے لیے 3 رکنی کمیٹی تشکیل

حملے کا مقدمہ انسداد دہشت گردی ڈیپارٹمنٹ نے فلائٹ لیفٹیننٹ محمد مصدق کی مدعیت میں درج کیا، فوٹو:فائل

---

بڈھ بیر میں پی اے ایف بیس پر حملے کا مقدمہ فلائٹ لیفٹیننٹ حسین محمد مصدق کی مدعیت میں درج کرلیا گیا جب کہ حملے کی تحقیقات کے لیے 3 رکنی کمیٹی بھی تشکیل دے دی گئی ہے۔



ایکسپریس نیوز کے مطابق بڈھ بیر میں پاک فضائیہ کے ایئر بیس پر حملے كا مقدمہ فلائٹ لیفٹیننٹ حسین محمد مصدق كی مدعیت میں انسداد دہشت گردی ڈیپارٹمنٹ نے نامعلوم دہشت گردوں کے خلاف درج کیا جس میں 7 اے ٹی اے، 5 ایکسپلوسیو، ¾ ایکسپلوسیس، 120 بی، 30 m 324، 353،427، 148، 149 اور15 اے اے كی دفعات چارج كی گئی ہیں ۔ پاک فضایہ کے فلائٹ لیفٹیننٹ محمد مصدق نے سی ڈی ٹی پشاور کو مراسلہ ارسال کیا جس میں انہیں بڈھ بیر فضائیہ کیمپ پر حملے اور اس میں ہونے والے جانی و مالی نقصانات کے بارے میں بھی آگاہ کیا گیا۔



پی اے ایف بیس كیمپ پرحملے كی تحقیقات کے لیے ایف آئی اے كے تفتیشی افسروں پر مشتمل 3 ركنی ٹیم بھی تشکیل دے دی گئی ہے جب کہ ٹیم نے متاثرہ بیس كیمپ كا دورہ كرکے جائے وقوعہ سے دہشت گردوں كے خون كے نمونے اور حملے میں استعمال ہونے والے ہتھیاروں سے فنگر پرنٹس بھی حاصل كیے، ایف آئی اے كی 3 ركنی ٹیم واقعہ كی 2 پہلوؤں پر رپورٹ تیار كرے گی۔ تفتیشی ٹیم پہلے پہلو میں دیکھے گی کہ واقعہ كیسے رونما ہوا اور دوسرے میں حملے میں استعمال ہونے والے بارود اور اسلحہ سے متعلق تفتیش کی جائے گی جب کہ تفتیشی ٹیم نے عینی شاہدین كے بیانات بھی قلمبند كرلیے۔







دوسری جانب ایئرفورس کے بیس کیمپ پر دہشت گردوں کے حملے میں شہید ہونے والے پاک فوج کے اہلکاروں کی ان کے آبائی علاقوں میں تدفین کردی گئی۔ پاک فضائیہ کے جونیئر ٹیکنیشن شان شوکت کی نماز جنازہ فیصل آباد کے علاقے رحمت آباد میں ادا کی گئی، نماز جنازہ میں پاک فضائیہ کے افسران جوانوں اور رشتہ داروں کے علاوہ عوام کی بڑی تعداد سے شرکت کی۔ پاک فضائیہ کے جونیئر ٹیکنیشن طارق عباس کی نماز جنازہ میانوالی کے علاقے موچھ میں ادا کر دی گئی۔ طارق عباس کو نماز جنازہ کے بعد اعلی فوجی اعزاز کے ساتھ سپرد خاک کیا گیا۔ سانحہ پشاورمیں شہید ہونے والے پاک فضائیہ کے اہلکارمحمد افضل کی نمازجنازہ ملتان کے نواحی علاقے مبارک پور میں ادا کی گئی جب کہ پاکستان ائر فورس کے جونئیر ٹیکنیشن عامر شہزاد کی نمازجنازہ میانوالی کے علاقے دندی شریف میں ادا کی گئی۔ ریڈار آپریٹر منیر احمد کو نماز جنازہ کی ادائیگی کے بعد ان کے آبائی علاقے گجرات میں سپرد خاک کیا گیا۔





بڈھ بیر میں پاک فضائیہ کے کیمپ پر حملہ آور دہشت گردوں کیخلاف فرنٹ لائن پر لڑنے والے کیپٹن اسفندیار بخاری کی نماز جنازہ ان کے آبائی شہر اٹک میں ادا کی گئی جس میں سول و عسکری حکام کے ساتھ علاقہ مکینوں کی بڑی تعداد نے شرکت کی جس کےبعد انہیں فوجی اعزاز کے ساتھ آبائی قبرستان میں سپرد خاک کردیا گیا۔