زمبابوے سے سیریز کیلیے قومی کرکٹرزکی تیاریاں آخری مراحل میں داخل ہو گئیں

کھلاڑیوں نے وارم اپ ہونے کے بعد فیلڈنگ کا طویل سیشن کیا:فوٹو فائل

---

زمبابوے سے سیریز کیلیے قومی کرکٹرزکی تیاریاں آخری مراحل میں داخل ہو گئیں،کھلاڑیوں نے بھرپورپریکٹس سے صلاحیتوں کو نکھارنے کا سلسلہ جاری رکھا، احمد شہزاد نے شادی کے روز بھی رخصت نہ لی،تربیتی کیمپ اتوار کو ختم ہوجائے گا۔

تفصیلات کے مطابق دورئہ زمبابوے کیلیے قومی کرکٹرز کا تربیتی کیمپ گذشتہ روز بھی قذافی اسٹیڈیم لاہور میں جاری رہا، کھلاڑیوں نے وارم اپ ہونے کے بعد فیلڈنگ کا طویل سیشن کیا، نیٹ میں بولنگ اور بیٹنگ پریکٹس بھی کی، ہیڈ کوچ وقار یونس اور معاون اسٹاف نے پلیئرز کی خامیوں کی نشاندہی کرتے ہوئے بہتری کیلیے مفید مشورے دیے۔

احمد شہزاد نے اپنی شادی کے روز بھی کیمپ سے چھٹی لینے سے گریز کیا اور دیگر کھلاڑیوں کے ہمراہ ٹریننگ میں بھرپور حصہ لیا،کیمپ اتوار کو ختم ہو جائے گا جس کے بعد کھلاڑی عید کی چھٹیوں پر اپنے گھروں کو چلے جائیں گے،قومی ٹیم 22اور23 ستمبر کی درمیانی شب ہرارے روانہ ہو گی۔