بڈھ بیر کیمپ پر حملے میں ملوث دہشت گرد چار سدہ سے گرفتار

حساس اداروں نے دہشت گرد کو تفتیش کے لئے نامعلوم مقام پر منتقل کردیا جس کا تعلق افغانستان سے بتایا جاتا ہے۔ فوٹو:فائل

---

حساس اداروں نے چارسدہ میں کارروائی کرتے ہوئے بڈھ بیر حملے میں ملوث دہشت گرد کو گرفتارکرلیا۔

ایکسپریس نیوز کے مطابق حساس اداروں نے چار سدہ پر دہشت گرد کی موجودگی کی اطلاع پر کارروائی کرتے ہوئے پاک فضائیہ کے کیمپ پر حملے میں ملوث دہشت گرد کو گرفتار کرتے ہوئے نامعلوم مقام پر منتقل کردیا۔ ذرائع کے مطابق گرفتار دہشت گرد کا تعلق افغانستان سے ہے جس سے تفتیش کے لئے نامعلوم مقام پر منتقل کیا جاچکا ہے۔

واضح رہے کہ پشاور کے قریب انقلاب روڈ پر پاک فضائیہ کے بڈھ بیر کیمپ پر مسلح دہشت گردوں کے حملے میں سیکیورٹی اہلکاروں سمیت 29 افراد شہید اور 29 زخمی ہوگئے تھے جب کہ سیکیورٹی فورسز کی کارروائی میں 13 حملہ آور بھی مارے گئے تھے۔