کراچی میں زبردستی کھالیں چھیننے والے 8 ملزمان گرفتار

ملزمان کے قبضے سے ڈیڑھ سو کے قریب کھالیں بھی برآمد ہوئیں ہیں، زرائع رینجرز۔ فوٹو: فائل

---

رینجرز نے شہر کے مختلف علاقوں میں کارروائیوں کے دوران شہریوں سے زبردستی کھالیں چھیننے والے 8 ملزمان کو گرفتار کرلیا۔

ایکسپریس نیوز کے مطابق رینجرز ذرائع کا کہنا ہے کہ نیو کراچی، لانڈھی، لیاقت آباد، نگی ٹاؤن اور جیکب لائن میں شہریوں کی شکایات پر زبردستی کھالیں چھیننے والے 8 ملزمان کو گرفتار کرکے 150 سے زائد کھالیں قبضے میں لے لیں۔ رینجرز ذرائع کا کہنا ہے کہ گرفتار ملزمان میں سے 5 کا تعلق سیاسی جماعت جب کہ 3 کا تعلق کالعدم تنظیموں سے ہے۔

واضح رہے کہ کراچی سمیت سندھ بھر میں قربانی کے جانوروں کی کھالوں کے حوالے سے سخت لائحہ عمل ترتیب دیا گیا ہے جس کے مطابق صرف رجسٹرڈ فلاحی ادارے اور تنظیمیں ہی کھالیں جمع کر سکتی ہیں جب کہ سیاسی جماعتوں اور کالعدم تنظیموں پر کھالیں جمع کرنے پر پابندی عائد ہے۔