کشمیر پر اقوام متحدہ کی قرارداد پر عملدرآمد اور استصواب رائے کرایا جائے نواز شریف

وزیراعظم نواز شریف سے اقوام متحدہ کے سیکرٹری جنرل بان کی مون نے ملاقات کی اس موقع پر پاکستان نے بھارت کےجارحانہ طرزعمل پراقوام متحدہ میں شدید احتجاج ریکارڈ کرایا جب کہ ان کا کہنا تھا کہ بھارتی رویئے سے خطے اور عالمی امن کے لئے خطرات پیدا ہورہے ہیں، اقوام متحدہ کشمیر سے متعلق قراردادوں پر عملدر آمد کرائے۔





ایکسپریس نیوز کے مطابق وزیراعظم نواز شریف اقوام متحدہ کی جنرل اسمبلی سے خطاب کے لئے نیویارک میں موجود ہیں اور ان سے اقوام متحدہ کے سیکرٹری جنرل بان کی مون نے ملاقات کی۔ ملاقات کے دوران وزیراعظم نوازشریف کا کہنا تھا کہ پاکستان صبر و تحمل کا مظاہرہ کررہا ہے، بھارتی رویئے سے خطے اور عالمی امن کے لئے خطرات پیدا ہورہے ہیں۔




وزیراعظم نے لائن آف کنٹرول اور ورکنگ باؤنڈری کی سنگین خلاف ورزیوں پراحتجاج ریکارڈ کرایا جب کہ بان کی مون نےبھی پاک بھارت کشیدگی پر اظہار تشویش کرتے کہا کہ اقوام متحدہ دونوں ممالک کے درمیان کشیدگی کم کرنے کو تیار ہے۔ سیکرٹری جنرل اقوام متحدہ کا کہنا تھا کہ امن مشنز میں پاکستان بہترین کردار ادا کررہا ہے کہ اور اس کی معیشت میں بہتری قابل ستائش ہے۔





دوسری جانب وزیراعظم نواز شریف کا ترقیاتی ایجنڈے کی منظوری سے متعلق اجلاس سے خطاب کے دوران کہنا تھا کہ 2015 کے بعد کا ترقیاتی ایجنڈا سب کو ساتھ لے کرچلنے کا عزم ہے اور ترقیاتی مقاصد حاصل کرنے کے لیے ٹھوس اقدامات کرنے ہوں گے تاہم اقوام عالم کواہداف حاصل کرنے کے لیےمشترکہ کوششیں کرنی ہوں گی۔ ان کا کہنا تھا کہ دنیا کو رہنے کے لئے بہتر جگہ بنانا سب کی ذمہ داری ہے جس کے لئے ضروری ہے کہ ہمیں ماحولیاتی تبدیلیوں سے نمٹنے کے لئے موثر اقدامات کئے جائیں اورغربت کے خاتمے کا ہدف حاصل کرنا تاحال باقی ہے جب کہ وژن 2025 ترقیاتی اہداف کی جانب ہمارا عملی قدم ہے۔

https://www.dailymotion.com/video/x37wk1x_pm-nawaz_news