شہریار خان کے دو ٹوک موقف سے بھارتی کرکٹ حکام تلملا اٹھے

‘بھارت نے سیریز کھیلنے سے انکار کیا تو ہو سکتاہے کہ ہم بھارت سے آئی سی سی اور اے سی سی ایونٹس میں بھی مقابلہ نہ کریں

Sports Desk September 28, 2015

پی سی بی چیئرمین آئی سی سی اور بی سی سی آئی کو دھمکارہے ہیں، انٹرنیشنل ایونٹس کا بائیکاٹ کیا تو خمیازہ بھگتنا پڑیگا، راجیوشکلا۔ فوٹو: فائل

چیئرمین پی سی بی کے دو ٹوک موقف پر بھارت تلملا اٹھا، انڈین پریمئر لیگ کے سربراہ راجیو شکلا نے کہا ہے کہ کیا شہریار خان آئی سی سی اور بی سی سی آئی کو دھمکا رہے ہیں؟

تفصیلات کے مطابق بھارتی پنجاب کے شہر گورداس پور میں پولیس اسٹیشن پر حملہ کے بعد دونوں ملکوں کی سرحدوں اور سیاسی کشیدگی میں بھی اضافہ ہوا، ہمیشہ ٹال مٹول سے کام لینے والے بی سی سی آئی کو بھی جواز تراشی کا موقع مل گیا، بورڈ کے سیکریٹری انوراگ ٹھاکر جو کہ سیاستدان بھی ہیں ہرزہ سرائی میں پیش پیش اور باہمی مقابلوں کی امیدوں پر پانی پھیرتے رہے، عید سے قبل ''ایکسپریس '' کو خصوصی انٹرویو میں چیئرمین پی سی بی شہریارخان نے بھی پہلی بار دو ٹوک موقف اختیار کرتے ہوئے کہا تھا کہ اگر بی سی سی آئی نے دسمبر میں سیریز کھیلنے سے باضابطہ طورپر انکار کر دیا توہو سکتا ہے کہ ہم بھارت سے آئی سی سی اور اے سی سی ایونٹس میں بھی مقابلہ نہ کریں، ابھی یہ بات حتمی نہیں مگر ایک آپشن ضرور ہے۔

چیرمین پی سی بی کا کہنا تھا کہ جو بھارتی وزارت ایسے معاملات دیکھتی ہے اس سے تاحال اجازت ہی نہیں مانگی گئی جوکہ بڑے افسوس کی بات ہے، صرف 2،3 ماہ رہ گئے لہذا ہمیں بتایا جائے کہ کھیلنا ہے یا نہیں، اگر جواب انکار میں ہوا تو ہم معاہدے سے پھرنے پر ضروری ایکشن لینے کا حق محفوظ رکھتے ہیں۔ چیئرمین پی سی بی کے اس بیان کو بھارتی میڈیا میں نمایاں کوریج ملی، بورڈ حکام بھی تلملا اٹھے اورایک بار پھر ہرزہ سرائی پر اتر آئے ہیں، لکھنؤ میں میڈیا سے بات کرتے ہوئے انڈین پریمیئر لیگ کے سربراہ راجیو شکلا نے دھمکی آمیز انداز میں کہا ہے کہ اگر پاکستان نے آئی سی سی مقابلوں میں بھارت کا بائیکاٹ کیا تو اسے خمیازہ بھگتنا پڑے گا۔ انھوں نے کہا کہ کیا شہریار خان اپنے اس بیان سے آئی سی سی اور بی سی سی آئی کو دھمکا رہے ہیں؟ پاکستان آئی سی سی قوانین کا پابند ہے، اگر وہ پیچھے ہٹا تو اس پر جرمانہ عائد ہوگا۔

راجیو شکلا نے کہا کہ کوئی بھی ملک پاکستان میں کھیلنے کو تیار نہیں، میں یہاں ایک اپیل کرتا ہوں کہ کیا پی سی بی اپنے ملک میں کھلاڑیوں کی سلامتی کی ضمانت دے سکتا ہے؟ سیکیورٹی خدشات کی وجہ سے انگلینڈ اور آسٹریلیا تو درکنار بنگلہ دیش بھی اپنی ٹیم پاکستان بھیجنے پر آمادہ نہیں۔ انھوں نے سیریز کے امکانات کو مسترد کرتے ہوئے کہا کہ پاکستان کیساتھ سیریز کو حتمی شکل دینے کے بعد حکومت سے اجازت لیں گے لیکن اس سے پہلے بڑے مسائل ہیں جنہیں حل کرنا باقی ہے،ان میں سیکیورٹی سر فہرست ہوگی لہذا دسمبر میں مقابلوں کا کوئی امکان نہیں۔