جنرل راحیل کو عہدے کی میعاد میں توسیع مل جائے گی اکنامسٹ

جنرل راحیل شریف کی قدرو منزلت پاکستانی عوام کی نظروں میں بڑھتی جا رہی ہے، برطانوی جریدہ

INP September 28, 2015

لاہور کے ضمنی انتخابات ہوں یا کراچی کے بل بورڈزہرجگہ جنرل راحیل شریف کی تصاویراپنی چمک دمک کے ساتھ آویزاں ہیں۔ فوٹو: فائل

معروف برطانوی جریدے ''اکنامسٹ'' نے اپنی ایک تازہ رپورٹ میں کہا ہے کہ پاکستانی آرمی چیف جنرل راحیل شریف اسٹار بن کرعوام کے دلوں میں گھر کر رہے ہیں ان کی سب سے بڑی کامیابی پاک فوج کے وقار کو بحال کرنا اور اسے نئی شان و شوکت سے نوازنا ہے۔

خیال ظاہر کیا جارہا ہے کہ جنرل راحیل شریف کے عہدے کی معیادمیں 3سال تک کی توسیع کردی جائے گی، اس حق میں بہت سی آوازیں اٹھ رہی ہیں جن میں پرویز مشرف کی آوازبھی شامل ہے۔ برطانوی جریدے نے اپنی تازہ رپورٹ میں جنرل راحیل شریف کے عہدہ سنبھالنے سے لے کر اب تک کے تمام اقدامات اور اس کے دور رس نتائج کا جائزہ لیاہے۔

رپورٹ کے مطابق جنرل راحیل شریف کی قدرو منزلت پاکستانی عوام کی نظروں میں بڑھتی جا رہی ہے، لاہور کے ضمنی انتخابات سے متعلق پوسٹرز ہوں یا ساحلی شہر کراچی کے بل بورڈزہرجگہ جنرل راحیل شریف کی تصاویراپنی چمک دمک کے ساتھ آویزاں ہیں، کوئی دن ایسا نہیں گزرتا جب پاکستانی اخبارات کے صفحہ اول پر ان کی تصویر شائع نہ ہوتی ہو،رنگوں سے کھیلنے والے مصور ٹرکوں اوررکشوں پربھی ان کی تصاویر بنارہے ہیں۔