گوئٹے مالا میں لینڈ سلائڈنگ سے 131 افراد ہلاک300 سے زائد افراد لاپتہ

وسطی امریکی ملک گوئٹے مالا میں گزشتہ ہفتے ہونے والی طوفانی بارشوں کے بعد لینڈ سلائیڈنگ سے ہلاک افرد کی تعداد 131 تک پہنچ گئی جب کہ 300 سے زائد افراد اب بھی لاپتہ ہیں۔


غیر ملکی خبر رساں ادارے کے مطابق گوئٹے مالا میں گزشتہ ہفتے ہونے والی طوفانی بارشوں نے تباہی مچا دی ہے اورشدید بارشوں کے باعث لینڈ سلائیڈنگ کے نتیجے میں ہلاک ہونے والوں کی تعداد 131 تک پہنچ گئی ہے جب کہ 300 سے زائد افراد اب بھی لاپتہ ہیں۔ ریسکیو حکام کے مطابق صرف ال کمبرے ڈوس نامی گاؤں سے 26 افراد کی لاشیں نکالی جا چکی ہیں جہاں لینڈ سلائیڈنگ کے باعث 125 سے زائد مکانات بھی تباہ ہوئے۔

گوئٹے مالا کی ڈیزاسٹر ایجنسی کے حکام کا کہنا ہے کہ جس وقت لینڈ سلائیڈنگ کا واقعہ پیش آیا اس وقت بیشتر افراد گھروں میں سو رہے تھے جس کے باعث ہلاکتوں میں اضافہ ہوا، قدرتی آفت کے بعد 500 سے زائد ریسکیو اہلکار فلاحی کاموں میں ملوث ہیں جب کہ اسپتالوں میں بھی ایمرجنسی نافذ کردی گئی ہے۔