کالا باغ اور دیگر ڈیموں پر سندھ پختونخوا بلوچستان سے مشاورت شروع

15اکتوبرکوحیدرآباد میں اہم اجلاس طلب،پانی کے زیاں کوروکنے پرغور کیاجائیگا،سفارشات وزیراعظم کوپیش کی جائینگی

تنویر محمود راجہ October 12, 2015

واپڈااجلاس کے ذریعے کالاباغ ڈیم کی راہ ہموارکررہاہے جس کی بھرپور مخالفت کی جائیگی،سندھ نے کھل کرتحفظات کااظہارکردیا۔ فوٹو: فائل

وزارت پانی و بجلی نے کالاباغ ڈیم سمیت مختلف ڈیم بنانے سے متعلق اتفاق رائے پیدا کرنے کیلیے سندھ، بلوچستان اور خیبر پختونخوا سے مشاورت شروع کر دی ہے۔

صوبوں کی طرف سے کالاباغ ڈیم کی مخالفت کے بعد وزیراعظم نواز شریف کی خصوصی ہدایت پر مخالفت کرنیوالے صوبوں کو قائل کرنے کیلئے ان سے واٹر سیکیورٹی ایشو پر بات چیت اور مشاورت کا سلسلہ شروع کیا جا رہا ہے، وزارت پانی و بجلی کے ذرائع کے مطابق اس سلسلے میں اہم مشاورتی اجلاس15اکتوبر کو سندھ کے شہر حیدرآباد میں منعقد کیا جائیگا۔اجلاس میں ملک میں پانی کی بچت اور اس کے ضیاع کو روکنے سے متعلق غور کیا جائیگا اور اس حوالے سے ماہرین سے مشاورت کے بعد آئندہ کی حکمت عملی طے کی جائیگی۔اجلاس کے بعد متفقہ طور پر منظور ہونیوالی سفارشات اور تجاویز سے متعلق رپورٹ وزیراعظم کو پیش کی جائیگی۔ اجلاس میں آبپاشی، زراعت، ماحولیات، بہبود آبادی، پبلک ہیلتھ، انجینئرنگ کے صوبائی سیکریٹریز بھی شرکت کریں گے۔

ذرائع نے ایکسپریس کو بتایا ہے کہ یہ اجلاس گزشتہ دو اجلاسوں کی کڑی ہے جو اس سے پہلے پانچ اکتوبر کو لاہور اور آٹھ اکتوبر کو اسلام آباد میں منعقد کیے گئے۔پندرہ اکتوبر کو ہونیوالے اجلاس میں واٹر سیکیورٹی ایشو پر زرعی اور انجینئرنگ یونیورسٹیوںکیساتھ مشاورت کی جائے گی جبکہ آبادی کی موجودہ صورتحال، پانی کے منصفانہ استعمال اور اس کی اہمیت کو بھی اجاگر کیا جائیگا۔ ذرائع کا کہنا ہے کہ اس اجلاس میں پانی کی قلت کے پیش نظر کالاباغ ڈیم، بھاشا ڈیم اور اکھوڑی سمیت دوسرے اہم آبی ذخائر کی تعمیر پر بھی زور دیا جائیگا۔تاہم اس اجلاس کے حوالے سے سندھ کے حکام نے تحفظات کا اظہار کرتے ہوئے کہا ہے کہ واپڈا اس اجلاس کے ذریعے کالاباغ ڈیم بنانے کی راہ ہموار کر رہا ہے جس پر سندھ کی طرف سے بھرپور مخالفت کی جائے گی۔