لوڈشیڈنگ ختم کرنے کا وعدہ پورا ہوتا نظرآرہا ہے وزیراعظم

کب تک کھیل کود میں لگے رہیں گے، تنقید کرنے والوں کو غالباً کچھ اور نہیں آتا، نواز شریف کا تقریب سے خطاب۔ فوٹو: فائل

---

KARACHI: وزیراعظم نواز شریف نے کہا ہے کہ پرویز مشرف دور سے ملک میں لوڈشیڈنگ ہورہی ہے لیکن موجودہ حکومت کی کاوشوں کے بعد لوڈشیڈنگ ختم کرنے کا وعدہ پورا ہوتا نظرآرہا ہے۔





جھنگ کے علاقے حویلی بہادر شاہ میں گیس پائپ لائن منصوبے کے سنگ بنیاد کی تقریب سے خطاب کرتے ہوئے وزیراعظم نواز شریف کا کہنا تھا کہ ملک کا سب سے بڑا مسئلہ بجلی کی قلت ہے جس پر 2017 یا 2018 تک قابو پالیا جائے گا، بجلی کی لوڈشیڈنگ کا معاملہ 10 سال قبل حل ہوجانا چاہیئے تھا لیکن اس کا آغاز آج ہورہا ہے، پرویز مشرف کے زمانے سے ملک میں لوڈشیڈنگ ہورہی ہے اور2018 میں ملک سے لوڈشیڈنگ کا خاتمہ ہونا بہت بڑی کامیابی ہوگی۔ انہوں نے کہا کہ ترقیاتی منصوبوں کومکمل کرنے میں کچھ وقت لگتا ہے لیکن کچھ لوگ کہتے ہیں کہ حکومت ڈیلیور نہیں کرتی، ملک بھر میں ترقیاتی منصوبے لگنا ڈیلیور نہیں تو کیا ہے، کارکردگی پرتنقید کرنے والے دیکھیں ملک میں امن بحال ہورہاہے، گرد و غبار اڑانے والے آج بھی موجود ہیں وہ گرد اڑاتے رہیں گے اور ہم منزل تک پہنچیں گے، اس ملک میں خوشحالی آنی چاہیئے کب تک خوشیوں کو ترستے رہیں گے اور کب تک کھیل کود میں لگے رہیں گے، تنقید کرنے والوں کو غالباً کچھ اور نہیں آتا، پاکستان کے عوام نے موقع دیا ہے کہ ان کی خدمت کریں اور عوام دیکھیں گے کہ خدمت سے پاکستان کا نقشہ بدلے گا، ملک سے دہشت گردی کا خاتمہ ہوگا اور ملک ترقی کی جانب گامزن ہوگا۔



وزیراعظم نواز شریف کا کہنا تھا کہ وقت آگیا ہے کہ ملک کو آگے بڑھنا چاہیئے، کراچی کی روشنیاں دوبارہ بحال ہورہی ہیں جہاں ایک مرتبہ پھر بزنس آرہا ہے جب کہ تاجر شہرقائد میں امن سے پہلے سرمایہ کاری کے لئے دبئی میں ملا کرتے تھے لیکن اب وہ کراچی آنا شروع ہورہے ہیں۔ ان کا کہنا تھا کہ ایک ایک پیسے کو قوم کی امانت سمجھتے ہیں یہی وجہ ہے کہ حکومت نے 93 ارب روپے کے منصوبے کو 55 ارب روپے میں لگایا، یہی نہیں تین منصوبوں پر مجموعی طور پر 110 ارب روپے کی بچت کی ہے۔







دوسری جانب وزیراعظم نوازشریف کی زیرصدارت سیکیورٹی سے متعلق اعلیٰ سطح کا مشاورتی اجلاس ہوا جس میں وفاقی وزیرداخلہ چوہدری نثارعلی خان، وزیراعظم کے مشیر برائے خارجہ امور سرتاج عزیز، معاون طارق فاطمی، آرمی چیف جنرل راحیل شریف، ڈی جی آئی ایس پی آر لیفٹینٹ جنرل عاصم باجوہ سمیت دیگر نے شرکت کی جب کہ اجلاس میں ملکی سلامتی اورداخلی صورتحال سمیت نیشنل ایکشن پلان سے متعلق بھی تبادلہ خیال کیا گیا۔



ذرائع کے مطابق مشاورتی اجلاس میں وزیراعظم کے 19 اکتوبر کے دورہ امریکا سے متعلق بھی بات چیت کی گئی اور بالخصوص امریکی صدرباراک اوباما سے ملاقات اور اس میں خطے کی سلامتی اور پاکستان کے کردار کے حوالے سے ہونے والی بات چیت پر بھی غور کیا گیا۔