ایف بی آر نے گاڑیاں سستی کرنے کی مخالفت کردی

وزارت صنعت و پیداوار کی گاڑیوں کے نئے پلانٹس لگانے کی تجویز بھی ایف بی آر نے مسترد کردی

اظہر جتوئی October 19, 2015

وزارت صنعت و پیداوار کی گاڑیوں کے نئے پلانٹس لگانے کی تجویز بھی ایف بی آر نے مسترد کردی۔ فوٹو: اے پی پی/فائل

وزارت صنعت و پیداوار کی طرف سے نئی آٹو پالیسی میں 1500 سی سی گاڑیوں کے نئے پلانٹس کے قیام اور گاڑیوں کی قیمتیں کم کرنے کی تجویز کی ایف بی آر نے مخالفت کر دی۔

ایف بی آر نے موقف اختیار کیا ہے کہ پاکستان میں 1500سی سی گاڑیوں کی قیمتیں بھارت کے مقابلے میں کم ہیں اس لیے پاکستان میں بھارت سے کم قیمت پرگاڑیاں فروخت نہیں ہو سکتی ہیں، تمام اسٹیک ہولڈرز متفق نہ ہونے کی وجہ سے نئی پانچ سالہ آٹو پالیسی دو سال گزرنے کے باوجود منظور نہ ہو سکی۔ بار بار آٹو پالیسی کے مسودے میں تبدیلیاں کی جا رہی ہیں۔ نئی آٹو پالیسی کے نظرثانی مسودے کے مطابق وزارت صنعت و پیداوار نے تجویز دی ہے کہ نئے سرمایہ کاروں کو کم از کم دو سال تک مراعات دی جائیں، اس سلسلے میں کاروں اور ایل سی وی کے نئے سرمایہ کاروں کو پہلے 2سال تک 10فیصد امپورٹ ڈیوٹی عائد کی جائے، جن میں لوکل اور نان لوکل دونوں پرزہ جات بنانے والے شامل ہوں گے،اس کے بعد اگلے 3سالوں میں اس ڈیوٹی میں اضافہ کرکے 35فیصد کی جائے۔

اسی طرح کی پالیسی رکشہ، بسوں، ٹرک اور ٹریکٹرز کے پرزہ جات پر بھی 5سالوں تک کوئی اضافی ڈیوٹی عائد نہ کی جائے اور 1500 سی سی گاڑیوں کے نئے پلانٹس قائم ہونے چاہئیں اس سے نہ صرف روزگار ملے گا بلکہ گاڑیوں کی قیمتیں بھی کم ہوں گی، لیکن ایف بی آر نے کہا ہے کہ موجودہ انڈسٹری کو مزید مراعات نہیں دے سکتے ہیں۔ اس کے علاوہ ایف بی آر نے لوکل اور نان لوکل سطح پر تیار ہونے والے پارٹس کو سنگل ریٹ ڈیوٹی دینے کی بھی مخالفت کی دی ہے۔ وفاقی وزیر صنعت و پیداوار غلام مرتضی جتوئی کے مطابق نئی آٹو پالیسی کا مسودہ تیار ہے لیکن ابھی تک ایف بی آر کے تحفظات موجودہیں۔ انہوں نے کہا کہ نئی آٹو پالیسی میں گاڑیوں کے نئے پلانٹس لگنے سے مقابلے کی وجہ سے قیمتیں کم ہو ں گی لیکن ایف بی آر آٹو انڈسٹری کیلیے نئی آٹو پالیسی کی مخالفت کر رہا ہے۔