صرف پیپلزپارٹی کے احتساب کے خطرناک نتائج نکلیں گے آصف زرداری

پیپلزپارٹی کے سوا ملک میں سب کچھ اچھا ہے اور سب لوگ ہمارا ہی احتساب کریں، شریک چیرمین پی پی پی، فوٹو:فائل

---

پیپلز پارٹی کے شریک چیرمین آصف علی زرداری کا کہنا ہے کہ پاکستان میں اب صرف پیپلزپارٹی کا ہی احتساب ہوگا جس کے خطرناک نتائج نکلیں گے۔

پیپلز پارٹی کے شریک چیرمین آصف علی زرداری نے پارٹی رہنماؤں کے خلاف نیب تحقیقات کی منظوری پر اپنے شدید ردعمل کا اظہار کرتے ہوئے کہا کہ نیب اپنے دفاتر بند کرکے پیپلز سیکریٹریٹ ہی منتقل ہوجائے تو بہتر ہے کیونکہ اس نے آج پیپلز پارٹی کے رہنماؤں کے خلاف فیصلہ دے کر ہماری باتوں پر مہر لگادی ہے اور ون پارٹی احتساب کا ایک اور باب شروع کیا ہے۔

آصف زرداری کا کہنا تھا کہ اس ملک میں احتساب صرف پیپلزپارٹی کا ہوگا کیونکہ باقی سب نیب کے دائرہ اختیار سے باہر ہیں اور اس کے خطرناک نتائج نکلیں گے۔ انہوں نے کہا کہ پیپلزپارٹی کے سوا ملک میں سب کچھ اچھا ہے، سب لوگ ہمارا ہی احتساب کریں لیکن یاد رہے کہ یہ سب کچھ تاریخ بھی یاد رکھے گی۔

واضح رہے کہ نیب نے سابق وزیر تعلیم سندھ پیر مظہر الحق کے خلاف تحقیقات کی منظوری دی ہے جن پر اپنے دور میں 13 ہزار جعلی بھرتیوں اور قومی خزانے کو اربوں روپے کا نقصان پہنچانے کا الزام ہے جب کہ پی پی رہنما ارباب عالمگیر اور ان کی اہلیہ کے خلاف بھی تحقیقات کی منظوری دی گئی ہے۔