عالیہ بھٹ ’’اڑتا پنجاب‘‘ میں کرینہ کپور کے ساتھ مقابلے سے خوفزدہ

فلم اڑتا پنجاب چار مختلف کہانیوں یا ٹریکس پر مبنی ہے میری اور کرینہ کی کہانی الگ ہے، عالیہ بھٹ

Showbiz Desk October 27, 2015

حقیقت میں ہم سب ایک دوسرے سے کام سے خوش اور اس پر فخر کرتے ہیں، عالیہ بھٹ۔ فوٹو : فائل

2012 میں فلم ''اسٹوڈنٹس آف دی ائیر'' سے بالی ووڈ میں انٹری دینے والی اداکارہ عالیہ بھٹ جن کی حال ہی میں شاہد کپور کے ساتھ رومانوی کامیڈی فلم ''شاندار'' سینما گھروں کی زینت بنائی گئی ہے فلم ''اڑتا پنجاب'' میں اداکارہ کرینہ کپور خان کے ساتھ مقابلہ سے خوفزدہ ہوگئی ہیں اور کہا ہے کہ میں فلم میں ان کے مدمقابل نہیں ہوں اور نہ ہی میراان کے ساتھ کوئی مقابلہ ہے ۔

یہ بات انھوں نے بھارتی خبررساں ادارے سے گفتگو کرتے ہوئے کہی ۔عالیہ بھٹ کا کہنا تھا کہ فلم اڑتا پنجاب چار مختلف کہانیوں یا ٹریکس پر مبنی ہے میری اور کرینہ کی کہانی الگ ہے اسی طرح شاہد اور دلجیت دوشنج کی کہانی بھی ایک دوسرے سے مخلتف ہے اس لیے میں کسی طرح بھی اس فلم میں کرینہ کپور کا مقابلہ نہیں کرسکتی ۔

اڑتا پنجاب جو اس وقت تیاری کے مراحل میں ہے میں عالیہ بھٹ پہلی مرتبہ کسی دوسری اداکارہ کے ساتھ کام کررہی ہیں ۔ فلمساز مہیش بھٹ اور ماضی کی مشہور اداکارہ سونی رازدان کی بیٹی کا بالی ووڈ میں مقابلہ بازی کے رحجان کے سوال پر کہنا تھا کہ زندگی میں مقابلہ بازی کی فضا ہونا ضروری ہوتا ہے مگر اس کے باوجود مجھے اپنے کام کے بجائے اردگرد کیا ہورہا ہے پر توجہ دینے کی ضرورت نہیں حقیقت میں ہم سب ایک دوسرے سے کام سے خوش اور اس پر فخر کرتے ہیں ۔

عالیہ کا مزید کہنا تھا کہ جب میں نے فلمی دنیا میں قدم رکھا تو یہ میرے خاندان کی پروڈکشن میں بنائی جانیوالی فلم نہیں تھی جس سے اندازہ ہوتا ہے کہ میرے لیے فلم خاندان سے تعلق ہونا کوئی اہمیت نہیں رکھتا۔ اس کے علاوہ جو لوگ میراکام دیکھ کر تعریف کرتے ہیں تو محسوس ہوتا ہے کہ ان کی توقعات پر پورا اترآئی ہوں میری ہمیشہ سے یہ کوشش رہی ہے کہ فلم بینوں کو خوش دیکھوں اور خوش رکھوں۔