میر پور ملالہ حملے میں ملوث 2 افراد گرفتار اسلحہ برآمد

سیکیورٹی اداروں نے کارروائی 18 اکتوبر کو کی تھی تاہم خبر کو خفیہ رکھا گیا تھا،ذرائع ۔ فوٹو: فائل

---

سیکیورٹی اداروں نے ملالہ پر حملے میں ملوث 2 افراد کو میر پور (آزاد کشمیر) سے گرفتار کر کے تفتیش کے لیے نامعلوم مقام پر منتقل کر دیا۔

ملزمان سے اسلحہ بھی برآمد کر لیا گیا ہے ،گرفتار افراد کی مدد سے مرکزی ملزمان تک پہنچنے میں مدد ملے گی۔ تفصیلات کے مطابق ملالہ پر حملے کے الزام میں میر پور سے سیکیورٹی اداروں نے 2 افراد کو گرفتار کرلیا ہے۔ گرفتار کیے جانے والوں میں سیف اللہ اور شوکت شامل ہیں۔ ذرائع کے مطابقگرفتار افراد کے قبضے سے قانون نافذ کرنے والے اداروں نے اسلحہ برآمد کر کے انہیں تفتیش کے لیے نامعلوم مقام پر منتقل کر دیا ہے۔

ذرائع کا یہ بھی کہنا ہے کہ پہلے سے گرفتار افراد سے تفتیش کی روشنی میں ان دونوں افراد کو گرفتار کیاگیا ہے اور ان سے حاصل معلومات کی روشنی میں مرکزی ملزمان تک پہنچنے میں مدد ملے گی ۔ ذرائع کے مطابق یہ کارروائی 18 اکتوبر کو کی گئی تھی تاہم خبر کو خفیہ رکھا گیا تھا۔ گرفتار سیف اللہ کا تعلق اٹک جبکہ شوکت کا تعلق گجرات سے ہے۔