آئی سی سی ٹیسٹ رینکنگ یاسرشاہ نے دوسری پوزیشن حاصل کرلی

یاسرشاہ نے کیرئیر میں پہلی مرتبہ دوسری پوزیشن حاصل کی. فوٹو: اے ایف پی

---

انٹرنیشنل کرکٹ کونسل نے نئی ٹیسٹ رینکنگ جاری کردی جس کے مطابق پاکستانی لیگ اسپنر یاسر شاہ نے بہترین بولرز کی دوسری پوزیشن پر قبضہ جما لیا جب کہ انگلش بلے باز جوئے روٹ بہترین بیٹمسین قرار پائے ہیں۔

کولمبو اور دبئی ٹیسٹ کے اختتام کے بعد آئی سی سی نے کھلاڑیوں کی نئی ٹیسٹ رینکنگ جاری کردی جس کے مطابق پاکستانی کھلاڑیوں کی قسمت کھل گئی، بہترین بیٹسمینوں کی فہرست میں یونس خان نے ایک درجہ ترقی پاکرٹاپ 5 میں جگہ بنالی اور وہ چھٹے سے پانچویں نمبر پر آگئے، اسد شفیق نے شاندار بیٹنگ کی بدولت 6 درجہ ترقی پاکر 12ویں پوزیشن سنبھال لی اور یوں انہوں نے ویرات کوہلی، روس ٹیلر، شیونارائن چندرپال، برینڈم میکولم اور فاف ڈپلوسی کو پیچھے چھوڑ دیا۔ اسی طرح کپتان مصباح الحق نے رینکنگ میں 5 درجہ ترقی پا کر 11ویں پوزیشن حاصل کرلی۔ انگلش بلے باز جوئے روٹ نے 13 پوائنٹس حاصل کرکے پہلی پوزیشن پر قبضہ جمائے بیٹھے آسٹریلوی بلے باز اسٹیون اسمتھ سے پوزیشن چھین لی اور پہلی مرتبہ بہترین بیٹسمینوں کی فہرست میں پہلے نمبر پر آگئے۔

بولرزکی فہرست میں لیگ اسپنر یاسر شاہ نے 25 پوائنٹس حاصل کرکے دوسری پوزیشن حاصل کرلی اوروہ یوں 827 پوائنٹس کے ساتھ دوسرے نمبر پر ہیں انہوں نے اپنے کیرئیر میں پہلی مرتبہ دوسری پوزیشن حاصل کی یہی نہیں یاسر شاہ نے انگلش فاسٹ بولر جیمی اینڈریسن اور اسٹارٹ براڈ سمیت نیوزی لینڈ کے ٹرینٹ بولڈ کو بھی پیچھے چھوڑ دیا۔ بہترین بولرز کی فہرست میں جنوبی افریقا کے ڈیل اسٹین 905 پوائنٹس کے ساتھ بدستور پہلی پوزیشن پر موجود ہیں اور اگر انگلینڈ کے خلاف تیسرے اور آخری ٹیسٹ میں یاسر شاہ کا جادو چلتا ہے تو وہ ڈیل اسٹین سے پوزیشن چھین سکتے ہیں جس کے لئے انہیں مزید 78 پوائنٹس حاصل کرنا ہوں گے۔