تیل قیمتیں گرنے سے بڑی آئل کمپنیوں کے منافع میں نمایاں کمی

کمپنیوں نے اخراجات میں کٹوتی کی، سرمایہ کاری محدود اورنئے منصوبے روک دیے

AFP November 01, 2015

اٹلی کی ای این آئی کو952ملین یورو اور ناروے کی اسٹیٹ آئل کو 299 ملین یورو کا خسارہ ہوا فوٹو: فائل

خام تیل کی قیمتیں میں نمایاں کمی کے باعث دنیا بھر میں بڑی آئل کمپنیوں کے منافع میں نمایاں کمی ہوئی جبکہ بعض کمپنیوں کو خسارے کا بھی سامنا کرنا پڑا ہے جس کی وجہ سے بڑے آئل کمپنیوں نے اپنے آپریشنز کو قابل عمل بنانے کے لیے کیپٹل اخراجات میںکٹوتی پرتوجہ مرکوز کی ہوئی ہے جبکہ سرمایہ کاری محدود کرتے ہوئے نئے منصوبے روک دیے گئے ہیں تاہم ریونیو متاثر ہونے کے باوجود بڑی کمپنیوں کے حصص یافتگان کو ڈیویڈنڈ پیمنٹس محفوظ ہیں۔

واضح رہے کہ سال 2014 کے وسط سے اب تک خام تیل کی قیمتیں کم وبیش 50فیصد کم ہوچکی ہیں جس کی وجہ سے بڑے آئل گروپس کے مالیاتی نتائج سکڑرہے ہیں اور انھیں تیل کی تلاش کے اپنے مہنگے منصوبوں پر نظرثانی کرنی پڑ رہی ہے، 2010 میں خلیج میکسیکو تیل رساؤ حادثے سے متاثرہ برٹش انرجی کمپنی بی پی کا منافع رواں سال کی تیسری سہ ماہی میں 64فیصد کم ہوگیا اور اس نے اپنی 2015کے سرمایہ کاری بجٹ میں 4ارب ڈالر کٹوتی کردی ہے۔

بی پی چیف ایگزیکٹو باب ڈوڈلے کا کہنا ہے کہ ہم نئی قیمت کے ماحول سے ہم آہنگی کے لیے اپنے مالیاتی فریم ورک کو ری بیلنس کر رہے ہیں، دوسری طرف رائل ڈچ شیل کو رواں سال کی تیسری سہ ماہی میں 7.4 ارب ڈالر کا خسارہ ہوا، کمپنی نے الاسکا اور کینیڈا میں مہنگے منصوبے ختم کردیے ہیں اور مزید مسابقتی بننے پر توجہ دینے کے عزم کا اظہار کیا ہے۔

ادھر دنیا کی سب سے بڑی لسٹڈآئل کمپنی ایکزون موبل کو خالص منافع میں 47.5 فیصد کمی کا سامنا کرنا پڑا اور اس کا کہنا ہے کہ وہ کموڈیٹی پرائسز سے قطع نظر لاگتوں جیسے کاروباری اشاریوں پرتوجہ مرکوز کیے ہوئے ہے، اسی طرح فرانسیسی کمپنی ٹوٹل کے خالص منافع میں 69 فیصد کمی ہوئی اور اس نے رواں سال اپنا سرمایہ کاری بجٹ 10فیصد کم کر دیا ہے۔

اٹلی کی ای این آئی کو952ملین یورو اور ناروے کی اسٹیٹ آئل کو 299 ملین یورو کا خسارہ ہوا۔ اینالسٹ جیسپرلالر کا کہنا ہے کہ تمام بڑی کمپنیاں اخراجات کم کر رہی ہیں تاکہ 60ڈالر فی بیرل قیمت پر آپریشنز قابل عمل بنائے جا سکیں، سوچ یہ ہے کہ درمیانی مدت میں تیل قیمتیں اوسطاً 60ڈالر فی بیرل رہیں گی، اس سے کم شرح سود پر قرض لیول برقرار رکھتے ہوئے بڑی کمپنیاں کے ڈیویڈنڈز محفوظ رہیں گے۔

ایک اور ماہر الیگزینڈر نے کہاکہ آئل گروپس حصص یافتگان کو ادائیگیوں میں کمی روکنے کیلیے ہرممکن اقدامات کریں گے، وہ ڈیویڈنڈ کو چھونے کے بجائے کیپٹل اخراجات میں 2 سے3ارب کی کمی کو ترجیح دیں گے، بڑی کمپنیاں مارکیٹ کی توقعات پرپورا اترنا چاہتی ہیں، تیل کمپنیاں طویل مدت سے حصص یافتگان کو معمول کی ادائیگیاں برقرار رکھنے کیلیے کوششیں کر رہی ہیں تاکہ اچھے برے وقتوں میں اپنے حصص کو سرمایہ کاروں کیلیے پرکشش رکھا جاسکے، اگر کمپنیوں نے ڈیویڈنڈ میں کمی کی تو پھر سرمائے کا انخلا ہوگا۔