شارجہ ٹیسٹ پرفارمنس توقعات کے مطابق نہیں رہی مشتاق

جیسے جیسے کھیل آگے بڑھے گا وکٹ اور زیادہ سلو ہوتی جائے گی، بولنگ کوچ

Sports Desk November 02, 2015

جیسے جیسے کھیل آگے بڑھے گا وکٹ اور زیادہ سلو ہوتی جائے گی، بولنگ کوچ۔ فوٹو : فائل

پاکستان کا اظہر علی کو بطور اوپنر کھلانے کا تجربہ پہلی کوشش میں بری طرح ناکام ہوگیا، بیٹنگ آرڈر میں چھیڑ چھاڑ سے الجھنیں مزید بڑھ گئیں۔

تفصیلات کے مطابق پاکستان نے گذشتہ 5 برس کے دوران 13 مختلف اوپننگ جوڑیوں کو آزمایاجن میں محمد حفیظ اور توفیق عمر کی جوڑی نے سب سے زیادہ 35 اننگز ایک ساتھ کھیلیں۔ ٹیسٹ میں پاکستان کی مستحکم بیٹنگ لائن میں اوپننگ واحد کمزور کڑی ہے جس کو بہتر بنانے کے لیے شارجہ میں اظہرعلی کو اپنی تیسری مضبوط بیٹنگ پوزیشن سے ہٹا کر اسپیشلسٹ اوپنر شان مسعود کی جگہ کھلایا گیا اور وہ سات بالز کا سامنا کرنے کے بعد صفر پر آؤٹ ہوگئے۔

بولنگ کوچ مشتاق احمد نے اظہر علی کے ساتھ کیے جانے والے تجربے کے بارے میں کہا کہ میں سمجھتا ہوں کہ آپ ایک میچ میں اپنے ٹیم کمبی نیشن کے ساتھ تجربہ کرسکتے ہیں، پہلی اننگز میں ٹیم کے 234 رنزپر آؤٹ ہونے کے بارے میں مشتاق کا کہنا تھا کہ میرے خیال میں پہلے روز ہماری پرفارمنس توقعات کے مطابق نہیں تھی، ہم نے اہم مواقع پر وکٹیں گنوائی ہیں، آؤٹ فیلڈ کافی سلو تھی مگر میں سمجھتا ہوں کہ 4 یا 5 وکٹیں ہم نے خود ہی گنوا دیں، جیسے جیسے کھیل آگے بڑھے گا وکٹ اور زیادہ سلو ہوتی جائے گی۔