مودی سے ملاقات میں مسئلہ کشمیر پر بات کی جائے برطانوی اراکین پارلیمنٹ کا ڈیوڈ کیمرون کو خط

پچھلے کئی سالوں سے کشمیریوں پر بھارت کی جانب سے ظلم ڈھائے جارہے ہیں، برطانوی اراکین پارلیمنٹ، فوٹو: فائل

---

ISLAMABAD: برطانوی اراکین پارلیمنٹ نے وزیراعظم ڈیوڈ کیمرون کو خط تحریر کیا ہے جس میں نریندر مودی سے ملاقات میں مسئلہ کشمیر کا معاملہ اٹھا نے کا کہا گیا ہے۔

مسئلہ کشمیر کی گونج اب برطانوی ایوان تک بھی جا پہنچی ہے جہاں برطانوی اراکین پارلیمنٹ نے بھارتی وزیراعظم نریندر مودی کے دورہ برطانیہ کے موقع پر وزیراعظم ڈیوڈ کیمرون نے مسئلہ کشمیر پر بات کرنے کا کہا ہے۔ برطانوی پارلیمنٹ کے 30 اراکین نے وزیراعظم ڈیوڈ کیمروں کو خط تحریر کیا ہے جس میں ڈیوڈ کیمرون سے نریندر مودی کے دورہ برطانیہ میں مسئلہ کشمیر کا معاملہ اٹھانے کا کہا گیا ہے۔ اراکین پارلیمنٹ کی جانب سے تحریر کیے گئے خط میں کہا گیا ہےکہ پچھلے کئی سالوں سے کشمیریوں پر بھارت کی جانب سے مظالم ڈھائے جارہے ہیں اور مظالم کا یہ سلسلہ مودی حکومت میں زور پکڑ چکا ہے۔ ذرائع کے مطابق برطانیہ کے 200 مصنفوں کی جانب سے بھی ڈیوڈ کیمرون پر خط کے ذریعے مودی سے مسئلہ کشمیر پر بات کرنے پر زور دیا گیا ہے۔

بھارتی وزیراعظم نریندر مودی آج برطانیہ کے دورے پر پہنچ رہے ہیں جہاں وہ برطانوی وزیراعظم ڈیوڈ کیمرون سمیت دیگر اعلیٰ عہدیداروں سے ملاقات کریں گے جب کہ دوسری جانب نریندر مودی کی برطانیہ آمد کے موقع پر 10 ڈاوننگ اسٹریٹ پر ، سکھ اور کشمیری برادری، برطانوی طالب علموں اور دیگر کی جانب سے احتجاج کا امکان ظاہر کیا جارہا ہے۔

دوسری جانب بھارت میں مودی سرکاری کی انتہا پسندانہ پالیسیوں کے خلاف احتجاج کا سلسلہ برطانیہ تک بھی جا پہنچا ہے جہاں برطانیہ میں مقیم بھارتی شہریوں نے برطانوی پارلیمنٹ کی دیوار پر نریندر مودی کے دورے کے موقع پر ان کو خوش آمدید نہ کرنے کے نعرے درج کردیئے ہیں اور مودی کو ہٹلر سے تشبیہ دے کر ان کے ہاتھ میں تلوار تھامی تصویر بھی بنائی گئی ہے۔