اسلام آباد ایئرپورٹ سے بیرون ملک منشیات اسمگل کرنے کی کوششش ناکام خاتون مسافرگرفتار

بے نظیر انٹرنیشنل ایئرپورٹ پر تعینات حکام نے استنبول جانے والی ایک خاتون مسافر کے سامان سے 4 کلو ہیروئن برآمد کرکے اسے حراست میں لے لیا ہے۔


ایکسپریس نیوز کے مطاق اسلام آباد کے بے نظیر انٹر نیشنل ایئرپورٹ پر تعینات اے ایس ایف حکام نے نجی فضائی کمپنی کی پرواز کے ذریعے بیرون ملک جانے والی ایک خاتون کے سامان سے 4 کلو ہیروئن برامد کرلی۔ اے ایس ایف حکام نے ملزمہ کو گرفتار کرکے اینٹی نارکوٹکس فورس کے حوالے کردیا ہے۔

ایئرپورٹ حکام کا کہنا ہے کہ منشیات کی اسمگلنگ کے الزام میں رنگے ہاتھوں گرفتار ہونے والی ملزمہ کا نام سنبل ہے اور اس کا تعلق لاہور سے ہے، ملزمہ براستہ استنبول جنوبی افریقا جارہی تھی۔