سپریم کورٹ نے مون گارڈن کو گرانے کا سندھ ہائیکورٹ کا فیصلہ معطل کردیا

عدالت کا مون گارڈن کے بلڈر عبدالرزاق خاموش کو 15 روز کے اندر 10 کروڑ روپے کی گارنٹی جمع کرانے کا حکم۔۔ فوٹو: فائل

---

MANSEHRA: سپریم کورٹ آف پاکستان نے کراچی کے علاقے گلستان جوہر میں واقع ریلوے اراضی پر قائم مون گارڈن گرانے کا سندھ ہائیکورٹ کا فیصلہ معطل کردیا جب کہ سندھ ہائی کورٹ کے حکم پر پولیس نے مون گارڈن کے بلڈر عبدالرزاق خاموش کو اسلام آباد سے گرفتار کیا پھر انہیں تحریری ضمانت پر رہا کردیا گیا۔



ایکسپریس نیوز کے مطابق سپریم کورٹ نے سندھ ہائیکورٹ کے فیصلے کے خلاف مون گارڈن کے الاٹیز اور بلڈر عبدالرزاق خاموش کی درخواستیں سماعت کے لیے منظور کرلیں جب کہ عدالت نے ریلوے اراضی پر قائم مون گارڈن کو مسمار کرنے کے سندھ ہائیکورٹ کے فیصلے کو بھی معطل کردیا۔ اس موقع پر مون گارڈن کے بلڈر عبدالزاق خاموش نے عدالت کے روبرو مؤقف اختیار کیا کہ اگر بلڈنگ قوانین کی خلاف ورزی ہوئی ہے تو اس کے ذمہ دار وہ خود ہیں اس لیے اس کی سزا مکینوں کو نہ دی جائے جس پرعدالت نے عبدالرزاق خاموش کو 10 کروڑ روپے نقد بطور گارنٹی جمع کرنے کا حکم دیا۔



اس موقع پر بلڈر عبدالرزاق خاموش نے عدالت سے استدعا کی کہ فوری طور پراتنی بڑی رقم جمع کرانا ممکن نہیں اس لیے اس میں سہولت دی جائے جس پر عدالت نے مون گارڈن کے بلڈرکو 15 روز کے اندر اندر 5 کروڑ روپے سپریم کورٹ اور 5 کروڑ روپے کی بینک گارنٹی دینے کا حکم دیا جب کہ درخواستوں پر سماعت 15 روز بعد ہوگی۔



عدالت کے باہر میڈیا سے بات کرتے ہوئے عبدالرزاق خاموش نے کہا کہ مون گارڈن سے متعلق کوئی بات کرنے سے گریز کیا تاہم ان کا کہنا تھا کہ مجھے ابھی تک نہیں پتا میرے خلاف کیا کیس ہے جب کہ سپریم کورٹ کا جو بھی فیصلہ ہے میں اپنے وکیل سے مشورہ کرکے بات کرؤں گا۔



دوسری جانب پولیس عدالتی حکم پر پولیس کی ٹیم ایس ایچ او شارع فیصل کی سربراہی میں مون گارڈن کے بلڈرعبدالرزاق خاموش کی گرفتاری کے لیے اسلام آباد بھیجی گئی تھی جہاں پولیس ٹیم نے عبدالرزاق خاموش کو حراست میں لے کر تھانے منتقل کر دیا۔ ڈی آئی جی ایسٹ کا کہنا تھا کہ عبدالرزاق خاموش کراچی پولیس کو 2 فوجداری مقدمات میں مطلوب ہے جب کہ اس کے خلاف دھوکا دہی اورجعلسازی کی دفعات کے تحت مقدمات بھی درج کیے گئے ہیں اور اسے اسلام آباد میں کراچی پولیس نے گرفتار کیا ہے۔



ادھر عبدالرزاق کی گرفتاری کی خبر سن کر مون گارڈن کے مکینوں کے چہرے خوشی سے کھل اٹھے اورانہوں نے مٹھایاں بھی تقسیم کی تاہم پولیس نے اسے گرفتار کرنے کے کچھ ہی دیر بعد چھوڑ دیا۔ ذرائع کا کہنا ہے کہ تھانہ سیکریٹریٹ پولیس نے عبدالرزاق خاموش کے وکلا کی جانب سے درخواست ضمانت دائر کی جس پر عبدالرزاق کو تحریری ضمانت پر رہا کیا گیا ہے تاہم وہ کل سندھ ہائی کورٹ میں پیش ہوں گے۔



ڈائریکٹر اینٹی کرپشن کا کہنا ہے کہ مون گارڈن کی لیزسے متعلق کافی شکوک و شبہات ہیں جس کی تحقیقات کی جارہی ہیں جب کہ اس سلسلے میں اینٹی کرپشن نے سب رجسٹرار کے دفتر پر چھاپا بھی مارا ہے جس میں مون گارڈن سے متعلق ریکارڈ قبضے میں لیا گیا ہے۔

واضح رہے کہ 10 نومبر کو سندھ ہائیکورٹ نے گلستان جوہر میں واقع ریلوے اراضی پر قائم مون گارڈن کے فلیٹس 24 گھنٹے میں خالی کرانے کے احکامات جاری کئے تھے۔