رنبیر اور دپیکا فلم تماشا کی تشہیرکے لیے ٹرین کا سفرکریں گے

بالی ووڈ اسٹار رنیبر کپور اور دپیکا پڈوکون کی فلم ’’تماشا‘‘ 27 نومبر کو ریلیز کی جائے گی، فوٹو: فائل

---

بالی ووڈ کی مشہور فلمی رومانوی جوڑی رنبیر کپور اور دپیکا پڈوکون اپنی نئی آنے والی فلم''تماشا'' کی تشہیر کے لیے ٹرین میں سفر کریں گے۔

فلم کو کامیاب اور بہترین بزنس فلم بنانے کے لئے ریلیز سے قبل اس کی تشہیر کرنا بھی اداکاروں کے فرائض میں شامل ہوگیا ہے، یہی وجہ ہے کہ اداکار اپنی فلموں کو کامیاب بنانے کے لئے نت نئے انداز اپناتے ہیں، کئی مشہور رئیلٹی شوز اور مختلف مقابلوں میں جاکر فلموں کی پروموشن بھی کی جاتی ہے جب کہ بالی ووڈ اسٹار رنیبر کپوراوراداکارہ دپیکا پڈوکون بھی اپنی نئی آنے والی فلم ''تماشا'' کی پروموشن میں مصروف ہیں جس کے لیے وہ ممبئی سے نئی دہلی تک ٹرین میں سفر کریں گے۔

میڈیا رپورٹس کے مطابق بالی ووڈ جوڑی نئی دلی میں فلم کی پروموشن کے لیے ٹرین میں سفرکرے گی جہاں وہ عام عوام سے ملیں گے اورانہیں اپنی نئی آنے والی فلم کو پسند کرنے کے لئے قائل کرنے کی کوشش کریں گے۔

واضح رہے کہ فلم ''تماشا'' 27 نومبرکو ریلیز کی جائے گی۔