امریکی ریاست لوئزیانا میں فائرنگ سے 16 افراد زخمی

فائرنگ کے واقعہ کے وقت پارک میں 500 کے قریب افراد موجود تھے۔ فوٹو: فائل

---

امریکی ریاست لوئزیانا کے ایک پارک میں فائرنگ سے 16 افراد زخمی ہو گئے۔

غیر ملکی خبر رساں ادارے کے مطابق امریکی ریاست لوئزیایا کے شہر آرلینز کے اپر نائنتھ وارڈ میں لوگوں کی بڑی تعداد ایک میوزک بینڈ کے گانے کی عکس بندی دیکھنے میں مصروف تھے کہ 2 حملہ آوروں نے اندھا دھند فائرنگ کردی جس کے نتیجے میں 16 افراد زخمی ہو گئے۔ پولیس حکام کا کہنا ہے کہ فائرنگ کے واقعہ کے وقت پارک میں 500 کے قریب افراد موجود تھے جب کہ زخمیوں کو فوری طور پر قریبی اسپتال منتقل کیا گیا جہاں انہیں طبی امداد دی جا رہی ہے۔

واقعہ کے فوری بعد پولیس نے پورے علاقے کا محاصرہ کر کے حملہ آوروں کی تلاش کے لئے سرچ آپریشن شروع کر دیا ہے۔

واضح رہے کہ اس سے قبل رواں برس جولائی میں بھی ایک حملہ آور نے لوئزیانا کے شہر لافائٹ کے سنیما گھر میں فائرنگ کر کے 2 افراد کو ہلاک اور متعدد کو زخمی کردیا تھا۔