حیدرآباد عیدالاضحی پر سیکیورٹی کے فول پروف انتظامات کا فیصلہ

کھالیں جمع کرنے کیلیے کیمپ لگانے کی اجازت نہیں ہو گی، فرید جان کا اجلاس سے خطاب. فوٹو: فائل

---

ایس ایس پی حیدرآباد پیر فرید جان سرہندی نے کہا ہے کہ حکومت سندھ کے احکامات کے تحت ضلع میں کسی جماعت یا تنظیم کو قربانی کی کھالیں جمع کرنے یا اس سلسلے میں کیمپ لگانے کی اجازت نہیں دی جائے گی۔

یہ بات انھوں نے ایک اجلاس کی صدارت کرتے ہوئے کہی۔ اجلاس میں ایس پی سٹی امجد شیخ، ضلع کے ایس پی اوز اور ایس ایچ اوز بھی شریک تھے۔ ان کا کہنا تھا کہ جانوروں کی جگہ جگہ فروخت پر بھی پابندی عائد کی گئی ہے، قربانی کے جانور حکومت سے منظور شدہ مویشی منڈی میں ہی فروخت کیے جائیں، جن کی خفیہ کیمروں کے ذریعے مانیٹرنگ کی جا رہی ہے۔

اجلاس میں عید الاضحی کے موقع پر سیکیورٹی کے فول پروف انتظامات کو حتمی شکل دی گئی۔ نماز عید کے اجتماعات کی حفاظت کے لیے پولیس کی بھاری نفری تعینات کرنے اور شہر کے داخلی و خارجی راستوں کی کڑی نگرانی کی جائے گی جبکہ شہر کے اہم مقامات بس اڈوں، ریلوے اسٹیشن پر سادہ لباس اہلکار تعینات کیے جائینگے۔