کراچی میں دہشتگردوں کو کسی صورت دوبارہ منظم نہیں ہونے دیں گے ڈی جی رینجرز سندھ

عوام بلدیاتی انتخابات میں بلا خوف وخطر ووٹ کاسٹ کرنے کے لئے گھروں سے نکلیں، ڈی جی رینجرز سندھ فوٹو: فائل

---

لاہور: ڈی جی رینجرز سندھ میجر جنرل بلال اکبر کا کہنا ہے کہ دہشت گردوں کو کسی صورت دوبارہ منظم نہیں ہونے دیا جائے گا۔



کراچی میں میڈیا سے بات کرتے ہوئے میجر جنرل بلال اکبر کا کہنا تھا کہ ڈی جی رینجرز کا کہنا تھا کہ بلدیاتی انتخابات کے موقع پر فول پروف سیکیورٹی اقدامات کیے گئےہیں، عوام بلا خوف وخطر ووٹ کاسٹ کرنے کے لئے گھروں سے نکلیں، دہشت گرد ہمارے حوصلے پست نہیں کرسکتے، ان کے بزدلانہ حملوں سے ہمارا عزم مزید مضبوط ہوگا، امن کے دشمنوں کے خلاف کارروائیاں جاری رہیں گی اور کراچی آپریشن آخری دہشت گرد کے خاتمے تک جاری رہے گا۔



ڈی جی رینجرز کا کہنا تھا کہ ملٹری پولیس اور رینجرز پر حملے کی تحقیقات میں مثبت پیش رفت ہوئی ہے، ان واقعات میں ملوث دہشت گرد جلد ہی پکڑے جائیں گے، انہوں نے کہا کہ اس طرح کی وارداتوں کے ذریعے دہشت گرد کراچی میں دوبارہ منظم ہونے کا تاثر دینا چاہتے ہیں لیکن ہم کسی صورت ایسا نہیں ہونے دیں گے، پاکستان رینجرز امن کے دشمنوں، دہشت گردوں اور ٹارگٹ کلر ختم کرکے رہے گی۔