سرمایہ کاروں کا اعتماد 6ماہ میں4فیصد بہتر ہوگیا

31فیصد نے سرمایہ کاری بڑھنے کے امکانات کو رد کیا ہے

Business Reporter December 05, 2015

31فیصد نے سرمایہ کاری بڑھنے کے امکانات کو رد کیا ہے۔ فوٹو: فائل

اوورسیز انویسٹر چیمبر آف کامرس اینڈ انڈسٹریز (او آئی سی سی آئی) نے پاکستان میں کاروباری ماحول کے بارے میں سرمایہ کاروں کے اعتماد کی پیمائش کیلیے نومبر کے بزنس کانفیڈنس انڈیکس سروے کے نتائج جاری کردیے جس کے مطابق مقامی وغیرملکی سرمایہ کاروں کے مجموعی اعتماد میں گزشتہ 6ماہ کے دوران 4فیصد اضافہ ہوا،مارچ میں کیے گئے سروے میں اعتماد کا پیمانہ 18 فیصد پر تھا جو بڑھ کر 22 فیصد ہوگیا تاہم اوآئی سی سی آئی کے رکن غیرملکی سرمایہ کاروں کے اعتماد میں7فیصد کمی آئی، مارچ 2015میں غیرملکی سرمایہ کاروں کا اعتماد 48فیصد تھا جو نومبر میں کم ہوکر 41فیصد رہ گیا۔

اس موقع پراو آئی سی سی آئی کے صدر عاطف باجوہ نے کہا کہ سپرٹیکس کے منفی اثرات اور ٹیکس ریفنڈز میں تاخیر جیسے مسائل او آئی سی سی آئی ممبران کے اعتماد میں 7فیصد کمی کی بڑی وجوہ ہیں، حکومت پالیسیوں پر عمل درآمدیقینی بنانے کے ساتھ صوبائی اور وفاقی اداروں میں رابطے بہتر، ٹیکس نظام کی خامیاںدور اورٹیکس ریفنڈز کا مسئلہ فوری طور پر حل کرے۔ سروے میں شامل 33فیصد کاروباری اداروں نے آئندہ 6 ماہ میں کاروبار میں توسیع کا امکان ظاہر کیا جس میں 26فیصد نے کیپٹل سرمایہ کاری بڑھانے کا عندیہ دیا، 49فیصد نے فروخت میں اضافے کا امکان ظاہر کیا۔

18فیصد اراکین کا ماننا ہے کہ آئندہ 6ماہ میں روزگار کے مواقع بڑھیں گے، اس حوالے سے مینوفیکچرنگ میں 18فیصد، سروسز سیکٹر میں28فیصد اور ریٹیل سیکٹر نے 8 فیصد اعتماد ظاہر کیا ہے۔47فیصد سرمایہ کاروں کا کہنا ہے کہ پاکستان میں انرجی اینڈ پاور، مینوفیکچرنگ، سروسز، انفرااسٹرکچر اینڈ ٹیکسٹائل کے شعبوں میں سرمایہ کاری بڑھے گی۔

31فیصد نے سرمایہ کاری بڑھنے کے امکانات کو رد کیا ہے۔ سرمایہ کاری اضافے کے لیے پرامید سرمایہ کاروں کا ماننا ہے کہ 62 فیصد سرمایہ مقامی ذرائع جبکہ 38 فیصد نے غیرملکی سرمایہ کاری کا امکان ظاہر کیا ہے، مثبت نتائج میںریٹیل سیکٹر سرفہرست رہا جواپریل 2015 کے 15 فیصد مثبت کے مقابلے میں 10فیصد بڑھ کر 25 فیصد رہا جبکہ سروسز سیکٹر اور مینو فیکچرنگ سیکٹر کے شعبے کے بالترتیب 3 اور2فیصد مثبت اضافی نتائج سامنے آئے جبکہ ٹیکسٹائل اور سیمنٹ کے شعبوں نے خاطر خواہ مثبت اعتماد کا اظہار نہیں کیا۔