دبنگ خان فلم ’’سلطان‘‘ میں مارشل آرٹ چیمپئن سے مقابلہ کرتے نظر آئیں گے

بالی ووڈ کے دبنگ اسٹار سلمان خان اپنی نئی آنے والی فلم '' سلطان'' میں الٹی میٹ فائٹنگ کے چیمپئن ٹائیرون ووڈلے سے لڑتے نظر آئیں گے۔

بالی ووڈ سپراسٹار سلمان خان انڈسٹری میں اپنے قریبی دوست اور مسٹر پرفیکشنسٹ عامرخان کے نقش قدم پر چل نکلے ہیں، فلم ''سلطان'' میں اپنے کردار میں حقیقی رنگ بھرنے کے لیے وزن میں اضافہ کرنے کے ساتھ ساتھ پہلوانی اور مارشل آرٹ کی تربیت بھی لی ہے تاہم اب انہوں نے فلم میں ایک اور حقیقی رنگ بھرنے کے لیے مکس مارشل آرٹ کے چیمپئن ٹائیرون ووڈلے کو بھی اپنی فلم میں کاسٹ کرلیا ہے۔


میڈیا رپورٹس کے مطابق سلمان خان کی فلم ''سلطان '' میں مکس مارشل آرٹ کے چیمپئن ٹائیرون ووڈلے بھی جلوہ گرہوں گے جب کہ انہوں نے فلم کے لیے مناظر کی عکس بندی بھی کرالی ہے جس میں وہ دبنگ خان کے ساتھ لڑتے ہوئے نظر آئیں گے جب کہ ٹائیرون نے دبنگ خان کے ساتھ فلم میں کام کرنے پر خوشی کا اظہار کیا ہے۔

واضح رہے کہ فلم ''سلطان'' میں سلمان خان باکسر کا کردار ادا کررہے ہیں جو اگلے برس عید کے موقع پر ریلیز کی جائے گی۔