بھارت نے آئی سی سی کمائی میں زیادہ حصے کو اپنا ’حق‘ قرار دے دیا

ششانک منوہر نے ذاتی رائے دی، ہم اپنے حصے سے دستبردار نہیں ہوںگے، سیکرٹری بی سی سی آئی

Sports Desk December 07, 2015

ششانک منوہر نے ذاتی رائے دی، آئی سی سی کمائی میں زیادہ حصہ ہمارا حق ہے، انوراگ۔ فوٹو:اےایف پی/فائل

بی سی سی آئی کے سیکریٹری انوراگ ٹھاکر کہتے ہیں کہ ششانک منوہر نے اپنی ذاتی رائے پیش کی تھی، ہم اپنے حصے سے دستبردار نہیں ہوںگے، پچز پر ہونے والی تنقید بھی بلاجواز ہے، ناگپور کی پچ ناقص قرار دینے پر آئی سی سی کو جلد جواب دیں گے۔

تفصیلات کے مطابق بھارتی کرکٹ بورڈ کے صدر ششانک منوہر نے آئی سی سی کا چیئرمین بننے کے بعد بگ تھری کی مخالفت کی تھی جبکہ تین ممالک کے آئی سی سی کی کمائی میں زیادہ حصہ پانے کو بھی غیرمنصفانہ قرار دیا تھا، ان کے اس بیان کا کرکٹ جنوبی افریقہ اور سری لنکا بورڈ کی جانب سے سراہا گیا تھا تاہم بھارتی بورڈ میں اس تجویز کی مخالفت شروع ہوگئی، خود بورڈ کے سیکریٹری انوراگ ٹھاکر کو اپنے صدر منوہرکی یہ بات ایک آنکھ نہ بھائی، ان کا کہنا ہے کہ ششانک نے صرف اپنی ذاتی رائے دی تھی، جب ہم آئی سی سی کے ریونیو میں 70 فیصد حصہ ڈالتے ہیں تو بدلے میں 21 فیصد حاصل کرنا زیادہ نہیں ہے اور ویسے بھی یہ رقم ملک میں کھیل کے فروغ کیلیے صرف کی جاتی ہے، یہی وجہ ہے کہ ہماری ہر اسٹیٹ میں انٹرنیشنل لیول کا وینیو موجود ہے۔

ماضی میں آسٹریلیا اور انگلینڈ بھی ایسا کرتے رہے، ان پر اعتراض نہیں کیا گیا تو ہم پر انگلیاں کیوں اٹھائی جارہی ہیں۔ جنوبی افریقہ کے خلاف ٹیسٹ سیریز میں ناقص پچز پر انوراگ ٹھاکر کا کہنا تھا کہ یہ تنقید بلاجواز ہے، جب آسٹریلیا وغیرہ میں کوئی ٹیسٹ دو تین روز میں ختم ہوجاتا تو اس وقت وکٹ پر کوئی بات نہیںہوتی، ہمارے ملک میں ایسا ہوتو اعتراضات ہونے لگتے ہیں، ہوم ایڈوانٹج ہمارا حق اور اس سے دستبردار نہیں ہوسکتے، ہمیں آئی سی سی کی جانب سے ناگپور کی پچ کے بارے میں خط موصول ہوچکا جس کا جلد ہی جواب بھیج دیں گے۔