میئر کے اختیارات کی واپسی کیلیے عدلیہ سمیت تمام راستے اختیار کریں گے حیدرعباس رضوی

موجودہ بلدیاتی قوانین کوتسلیم نہیں کرتے جو منتخب نمائندوں کوسیاسی،انتظامی اور مالی اختیارسے محروم کرتا ہے، رہنما متحدہ، فوٹو: فائل

---

ایم کیوایم کے رہنما حیدر عباس رضوی کا کہنا ہے کہ بلدیاتی اداروں کو بااختیار بنانے کے لیے ہماری جدوجہد کا نیا باب کھلا ہے اور ہم یہ تمام اختیارات میئر کو واپس دلانے کے لیے عدالتوں سمیت تمام راستے اختیار کریں گے۔

کراچی میں ایم کیو ایم کے دیگر رہنماؤں کے ہمراہ پریس کانفرنس کرتے ہوئے حیدر عباس رضوی کا کہنا تھا کہ 2013 کا لنگڑا لولا بلدیاتی نظام عوام کے لیے ناقابل قبول ہے جس میں میئر کے پاس کچرا اٹھانے، پانی کی فراہمی کے اختیارات بھی نہیں تاہم ہم اپنے میئر کو بھکاری نہیں بنانا چاہتے۔ انہوں نے کہا کہ ایم کیوایم موجودہ بلدیاتی قوانین کوتسلیم نہیں کرتی جو منتخب نمائندوں کو سیاسی، انتظامی اور مالی اختیارسے محروم کرتا ہے جب کہ یہ بلدیاتی نظام کمشنر،ڈپٹی کمشنر،ایس ڈی ایم کے تابع ہے اور اختیارات منتخب نمائندوں کے بجائے بیوروکریسی کے پاس ہوں گے۔

حیدر عباس رضوی کا کہنا تھا کہ کراچی بلڈنگ کنٹرول اتھارٹی کو بھی سندھ بلڈنگ کنٹرول اتھارٹی بنا دیا گیا لہٰذا بلدیاتی اداروں کو بااختیار بنانے کے لیے ہماری جدوجہد کا نیا باب کھلا ہے اور ہم یہ تمام اختیارات میئر کو واپس دینے کے لیے عدالتوں سمیت تمام راستے اختیار کریں گے۔ انہوں نے کہا کہ بلدیاتی اداروں میں ٹھیکا دینے، تقرری وتبادلوں کاعمل فوری روکا جائے اور چیف سیکرٹری فوری طور پرمداخلت کرکے من پسند اقدامات کو رکوائیں، کرپشن اور لوٹ مار کے دروازے کھولنے والا کوئی کام نہ کیا جائے۔ انہوں نے مزید کہا کہ سندھ اسمبلی میں ایم کیوایم نے بلدیاتی قوانین کی منظوری کے وقت بھرپورمخالفت کی تھی۔

دوسری جانب وسیم اختر کا کہنا تھا کہ بلدیاتی اداروں کے اختیارات حکومت سندھ نے سلب کرلیے ہیں، بلدیاتی اداروں کو اختیارات دلوانے کے لیے چیف جسٹس ازخود نوٹس لیں۔