وزیر اعظم سے بھارتی وزیر خارجہ سشما سوراج کی ملاقات مذاکرات کی بحالی پر اتفاق

وزیراعظم نوازشریف اور بھارتی وزیر خارجہ سشما سوراج کے درمیان ملاقات میں پاک بھارت سیریز پر کوئی بات نہیں ہوئی، ذرائع، فوٹو: ایکسپریس نیوز

---

وزیر اعظم نواز شریف اور بھارتی وزیر خارجہ کے درمیان ملاقات ہوئی ہے جس میں تصفیہ طلب معاملات حل کرنے اور دونوں ممالک کے درمیان مذاکرات کی بحالی پر اتفاق ہوا۔

ایکسپریس نیوز کے مطابق وزیراعظم ہاؤس آمد پر وزیراعظم نوازشریف نے سشما سوراج کااستقبال کیا جب کہ دونوں کے درمیان ملاقات ایک گھنٹے تک جاری رہی جس میں مشیرخارجہ سرتاج عزیز،سیکرٹری خارجہ اعزازچوہدری، وزیر اعظم کے معاون خصوصی طارق فاطمی اور قومی سلامتی کے مشیر ناصر جنجوعہ شریک تھے اور بھارت کی جانب سے سشما سوراج کے ہمراہ بھارتی سیکرٹری خارجہ اوربھارتی ہائی کمشنر سمیت دیگر حکام نے شرکت کی۔

وزیراعظم اور بھارتی وزیر خارجہ کے درمیان ملاقات میں دونوں ممالک کے درمیان تصفیہ طلب معاملات کے حل اور دہشت گردی کے خاتمے پر امور پر بات چیت ہوئی جب کہ اس دوران دونوں ممالک کے درمیان مذاکرات کی بحالی پر بھی زور دیا گیا تاہم اس دوران پاک بھارت سیریز پر کوئی بات چیت نہیں ہوئی۔۔ ذرائع کے مطابق اس اہم ملاقات میں مسائل کے حل کے لیے باہمی رابطوں کو بڑھانے پر بھی اتفاق کیا گیا۔

ذرائع کا کہنا ہے کہ سشما سوراج نے وزیر اعظم نواز شریف کو بھارتی وزیراعظم کی جانب سے خیرسگالی کا پیغام پہنچایا جب کہ اس موقع پر وزیراعظم نوازشریف نے کہا کہ پاکستان بھارت سمیت تمام ہمسایہ ملکوں کےساتھ خوشگوارتعلقات چاہتا ہے، کسی بھی مسئلے کا حل بات چیت ہے اس لیے دونوں ممالک کوتمام تصفیہ طلب مسائل بات چیت سےحل کرنے چاہئیں۔