پاکستان اور بھارت کا مسئلہ کشمیر سمیت تمام تصفیہ طلب مسائل پر جامع مذاکرات پر اتفاق

وولر بیراج، سیاچن، سرکریک بھی جامع مذاکرات کا حصہ ہوں گے، مشترکہ اعلامیہ، فوٹو: اے ایف پی

---

پاکستان اور بھارت کے درمیان مسئلہ کشمیر سمیت تمام تصفیہ طلب مسائل کے حل کے لیے جامع مذاکرات پر اتفاق ہوگیا ہے جب کہ مذاکرات نئے سرے سے ہوں گے جس کا طریقہ کار سیکریٹری خارجہ طے کریں گے۔



اسلام آباد میں وزیراعظم کے مشیر برائے خارجہ سرتاج عزیز اور بھارتی وزیر خارجہ سشما سوراج کے درمیان ملاقات ہوئی جو ڈیڑھ گھنٹے تک جاری رہی جب کہ ملاقات میں پاک بھارت تعلقات میں کشیدگی کم کرنے اور نئے سرے سے مذاکرات کی بحالی پر بات چیت کی گئی۔



ملاقات کے بعد مشترکہ نیوز کانفرنس میں مختصر بات کرتے ہوئے بھارتی وزیر خارجہ سشما سوراج نے کہا کہ پاکستان اور بھارت جامع مذاکرات کے لیے تیار ہوگئے ہیں اور مذاکرات کو آئندہ بھی جاری رکھنے کا فیصلہ کیا گیا ہے۔ انہوں نے کہا کہ جامع مذاکرات کا آغاز نئے سرے سے ہوگا جس میں تمام مسائل پر بات چیت ہوگی اور جن امور پر بات رکی ہوئی تھی ان کو بھی مذاکرات میں شامل کیا جائے گا جب کہ کچھ اور چیزیں بھی شامل کی جاسکتی ہیں۔



سشما سوراج کا کہنا تھا کہ قومی سلامتی کے مشیروں کے بنکاک مذاکرات میں تمام چیزوں پربات ہوئی،اب کمپوزیٹ ڈائیلاگ کی جگہ کمپری ہینسو ڈائیلاگ ہوں گے جب کہ دونوں ملکوں کے درمیان مذاکرات کا طریقہ کار سیکرٹری خارجہ طے کریں گے جس میں کب کن اور کس سطح پر بات ہوگی یہ بھی طے کیا جائے گا۔ انہوں نے کہا کہ پاک بھارت مذاکرات سے متعلق تفصیلی بیان اپنی پارلیمنٹ میں دوں گی۔



دوسری جانب مشیر خارجہ سرتاج عزیز اور بھارتی وزیر خارجہ کی ملاقات کا مشترکہ اعلامیہ جاری کردیا گیا ہے جس کے مطابق ملاقات میں دونوں فریقین کی جانب سے دہشت گردی کی مذمت کی گئی جب کہ دہشت گردی کے خاتمے میں تعاون کا بھی عزم کیا گیا۔ مشترکہ اعلامیے کے مطابق انسداد دہشت گردی، نارکوٹکس کنٹرول کے امورجامع مذاکرات کاحصہ ہوں گے، وولربیراج، تلبل نیوی گیشن پروجیکٹ کے معاملات مذاکرات میں شامل ہوں گے جب کہ جموں و کشمیر سیاچن اور سرکریک پر بھی بات کی جائے گی۔



مشترکہ اعلامیے کے مطابق قومی سلامتی کے مشیرانسداد دہشت گردی سے متعلق امورپررابطے میں رہیں گے، دونوں ممالک اقتصادی وتجارتی تعاون پربھی جامع مذاکرات میں بات چیت کریں گے جب کہ دونوں ممالک کے درمیان عوامی رابطوں میں اضافہ کیا جائے گا۔ مشترکہ اعلامیے میں کہا گیا ہےکہ پاکستان کی جانب سے بھارت کو ممبئی حملوں کے ٹرائل کو جلد منطقی انجام تک پہنچانے کی یقین دہانی کرائی گئی ہے۔

واضح رہے کہ بھارتی وزیر خارجہ ہارٹ آف ایشیا کانفرنس کے سلسلے میں پاکستان آئی تھیں جہاں انہوں نے وزیراعظم نوازشریف سے بھی ملاقات کی جس میں دونوں ممالک کے تصفیہ طلب معاملات اور بات چیت کا عمل جاری رکھنے پر اتفاق کیا گیا۔