سلمان خان نے فلمساز سنجے لیلا بھنسالی کی کامیابی کا سہرا اپنی فلموں کو قرار دیدیا

بھنسالی میری فلموں ’’ہم دل دے چکے صنم‘‘ اور ’’خاموشی‘‘ کی کامیابیوں کی وجہ سے ہی انڈسٹری میں ہیں، بالی ووڈ اسٹار، فوٹو: فائل

---

DENVER: بالی ووڈ کے دبنگ سپر اسٹار سلمان خان نے معروف فلمساز سنجے لیلا بھنسالی کی کامیابیوں کا سہرا اپنی فلموں کو قرار دے دیا۔

بالی ووڈ اداکار سلمان خان کا شمار انڈسٹری کے صف اول کے اداکاروں میں ہوتا ہے جن کی فلم میں موجودگی کامیابی کی ضمانت سمجھا جاتا ہے یہی وجہ ہے کہ ہر فلمساز دبنگ خان کو فلم میں کاسٹ کرنے کے لیے بے تاب نظر آتا ہے جس کے باعث سلو میاں اپنی مرضی کے ڈائریکٹر کے ساتھ کام کرنے کی حامی بھرتے ہیں جب کہ اسی طرح سلمان خان نے کئی فلمسازوں کے کیرئیر کو سنبھالا دیا جس میں بالی ووڈ کے کئی نامور فلمساز بھی شامل ہیں تاہم اب بالی ووڈ اسٹار نے ایسے ہی ایک فلمساز کو تنقید کا نشانہ بنایا ہے۔

سلمان خان نے فلمساز سنجے لیلا بھنسالی کی دو فلموں میں ایک ساتھ کام کیا ہے جس میں ''ہم دل دے چکے صنم'' اور ''خاموشی'' شامل ہیں تاہم فلموں میں کام کرنے کے باوجود دونوں کے درمیان تعلقات ہمیشہ سے ہی کشیدہ رہے ہیں یہی وجہ ہے کہ سنجے لیلا بھنسالی کی فلم ''باجی راؤ مستانی'' کے ہیرو اداکار رنویر سنگھ اپنی فلم کی پروموشن کے لیے مشہور رئیلٹی شو ''بگ باس 9'' پہنچے تو دبنگ خان نے فلم ڈائریکٹر پر طنز کا موقع ہاتھ سے نہیں جانے دیا جب کہ رنویر سنگھ نے سلو میاں کی فلم ''ہم دل دے چکے صنم'' کی اداکاری کی تعریف کی جس کے جواب میں دبنگ خان نے فوراً کہا کہ بھنسالی صاحب میری فلموں ''ہم دل دے چکے صنم'' اور ''خاموشی'' کی کامیابیوں کی وجہ سے ہی اب تک انڈسٹری میں بچے ہوئے ہیں ۔

واضح رہے کہ فلمساز سنجے لیلا بھنسالی کی نئی آنے والی فلم ''باجی راؤ مستانی'' 18 دسمبر کو ریلیز کی جائے جس میں اداکار رنویر سنگھ ، دپیکا پڈوکون اور پریانکا چوپڑا مرکزی کردار ادا کریں گے۔