کراچی میں معروف کامیڈین رؤف لالا کو لوٹ لیا گیا

رؤف لالا اے ٹی ایم سے نقدی رقم لے کر نکلے تو گھات لگائے ڈاکوؤں نے اسلحے کے زور پر ان سے رقم چھین لی، فوٹو: فائل

---

PESHAWAR: شہر قائد میں اسٹریٹ کرائم نے ایک بار پھر سر اٹھانا شروع کردیا ہے جہاں ڈکیتی کی واردات میں معروف کامیڈین رؤف لالا کو لوٹ لیا گیا۔

ایکسپریس نیوز کے مطابق ملک کے معروف کامیڈین کو کراچی میں ڈاکوؤں نے لوٹ لیا جس میں ان سے نقدی رقم چھین لی گئی۔ رؤف لالا اے ٹی ایم سے نقدی رقم لے کر نکلے تو گھات لگائے ڈاکوؤں نے ان کا پیچھا کیا اور اسلحہ کے زور پر نقدی چھین کر با آسانی فرار ہوگئے۔ رؤف لالا کا کہنا ہےکہ ڈاکوؤں نے انہیں انتہائی رش والے علاقے میں دیدہ دلیری سے لوٹا۔

واضح رہے کہ رؤف لالا کا شمار پاکستان کے نامور کامیڈینز میں ہوتا ہے جب کہ وہ بھارت سمیت کئی ممالک میں کامیڈی شوز بھی کرچکے ہیں۔