انسانوں کی طرح سیکھنے اور سمجھنے والی جدید مشین

یہ مشین انسانی تاثرات، ڈانس میں ہونے والی حرکات اور بولے ہوئے الفاط بھی سمجھ سکے گی۔ فوٹو: فائل

---

ISLAMABAD: وقت کے ساتھ ساتھ ٹیکنالوجی میں بھی جدت آتی جا رہی ہے اور سائنسدانوں نے ایک ایسی مشین ایجاد کر لی ہے جو انسانوں کی طرح سیکھنے اور سمجھنے کی صلاحیت رکھتی ہے۔

سائنس جرنل میں شائع ہونے والی رپورٹ کے مطابق میسا چوسٹس انسٹی ٹیوٹ فار ٹیکنالوجی کے سائنسدانوں نے ایسی مشین ایجاد کی ہے جو انسانی صلاحیت پر قبضہ کرنے کی صلاحیت رکھتی ہے۔ سائسندانوں کا کہنا ہے کہ فی الحال یہ مشین انسانوں کی طرح ہاتھ سے لکھے گئے خط کو پڑھنے اور اسے یاد رکھنے کے صلاحیت رکھتی ہے لیکن عنقریب اس میں علامات کو سمجھنے والا سافٹ وئیر بھی نصب کیا جائے گا جس کے بعد یہ مشین انسانی تاثرات، ڈانس میں ہونے والی حرکات اور بولے ہوئے الفاط بھی سمجھ سکے گی۔

ایم آئی ٹی کے پروفیسر یوشاؤ ٹینن باؤم کہتے ہیں کہ وہ ایسی مشین یا روبوٹ بنانا چاہتے ہیں جو بچوں کی ذہنی صلاحیتوں کی طرح مظاہرہ کر سکے، جس طرح اسکول میں چھوٹی کلاس کے بچوں میں نئے تصورات جنم لیتے وہ نئی چیزیں سیکھنے کا عمل شروع کردیتے ہیں، ایسا ہی اُن کی مشین بھی عملی مظاہرہ کر سکے۔

ماہرین کا کہنا ہے کہ یہ مشین لرننگ پروگرام بروکلین پبلک لائبریری فریم ورک کی بنیاد پر بنائی گئی ہے اور اس مقصد کے لیے سادہ کمپیوٹر پروگرام بنائے گئے ہیں۔ ان پروگرامز کی مدد سے یہ مشین اپنے سابقہ سیکھی ہوئی چیزوں سے فائدہ اٹھاتی ہے جس سے اسے نئے تصورات سیکھنے میں اسے کم وقت درکار ہوتا ہے۔

سائنسدانوں کا کہنا ہے کہ ابتدائی تجربے کے طور پر اس مشین کو دنیا کی 50 زبانوں کے ہاتھ سے لکھے ہوئے 1600 سے زائد الفاظ دیئے گئے، فی الحال یہ مشین انسانی دماغ کا مقابلہ نہیں کر سکتی تاہم سائنسدانوں کو یقین ہے کہ مستقبل میں ایسا بھی ممکن ہو سکے گا۔