لاہورمیں دہشت گردی کا بڑا منصوبہ ناکام 6 دہشت گرد گرفتار

ملزمان کے قبضے سے بھاری تعداد میں اسلحہ اور بارودی مواد برآمد کیا گیا، کاؤنٹر ٹیررازم ڈیپارٹمنٹ، فوٹو: فائل

---

کاؤنٹر ٹیررازم ڈیپارٹمنٹ نے شہر میں دہشت گردی کا بڑا منصوبہ ناکام بناتے ہوئے6 دہشت گردوں کو گرفتار کرلیا۔

کاؤنٹرٹیررازم ڈیپارٹمنٹ (سی ٹی ڈی) کے مطابق لاہور کے مختلف علاقوں میں خفیہ اطلاع پر کارروائی کے دوران 6 دہشت گردوں کو گرفتار کیا گیا۔ سی ٹی ڈی حکام کےمطابق 3 دہشت گردوں کو کالج روڈ ٹاؤن شپ اور 3 کو بیدیاں روڈ سے گرفتار کیا گیا، ملزمان شہر میں دہشت گردی کی بڑی کارروائی کا منصوبہ بنارہے تھے جنہیں خفیہ اطلاع پر کارروائی کرتے ہوئے گرفتار کیا۔

کاؤنٹر ٹیررازم ڈیپارٹمنٹ کے مطابق گرفتار ملزمان میں عمر ساجد، جھنگوی، ہدایت اللہ، انعام الحق، یاسین اور عطااللہ عثمانی شامل ہیں جن کے قبضے سے بھاری مقدار میں بارود، ڈیٹونیٹرز اور الیکٹرک سرکٹ سمیت اسلحہ بھی برآمد کیا گیا ہے جب کہ ملزمان کو تفتیش کے لیے نامعلوم مقام پر منتقل کردیا گیا ہے۔