بھارت ہائیڈروجن بم بنانے کی تیاریوں میں مصروف ہے امریکی میگزین کا انکشاف

ہائیڈروجن بم بنانے کے منصوبے کو براہ راست وزیراعظم ہاؤس سے کنٹرول کیا جارہا ہے، امریکی میگزین، فوٹو: فائل

---

امریکی میگزین نے انکشاف کیا ہے کہ بھارت ہائیڈروجن بم بنانے کی تیاریوں میں مصروف ہے جب کہ بم کی آزمائش کے لیے بھارتی ریاست کرناٹکا میں ایک خفیہ جوہری شہر بھی قائم کیا جارہا ہے۔

برصغیر میں اپنی بالادستی کو قائم رکھنے کے لیے بھارت نے ہمیشہ جارہانہ رویہ اپنائے رکھا ہے اور خطے میں اپنے تسلط کو قائم رکھنے کے لئے ہتھیاروں کی دوڑ میں بھی ہمیشہ آگے رہنے کے جنون میں مبتلا رہا ہے جب کہ اب ایک بار پھر بھارت کے اس جنون سے متعلق امریکی میگزین فارن پالیسی میں جاری ہونے والی رپورٹ میں خطے کے سب سے بڑے خفیہ جوہری منصوبے کا انکشاف ہوا ہے جس میں کہا گیا ہے کہ بھارت ہائیڈروجن بم بنانے کی تیاریوں میں مصروف ہے جس کے لیے ریاست کرناٹکا میں منصوبہ زیر تکمیل ہے جب کہ اس کا مقصد زیادہ سے زیادہ افزودہ یورینیم حاصل کرنا ہے جوہایئڈروجن بم بنانے میں مددگار ہوگا۔

رپورٹ میں کہا گیا ہے کہ 2012 میں بھارتی شہر کرناٹکا کے شہر چھلاکرے میں اس منصوبے کو شروع کیا گیا تھا تاہم بھارتی حکومت اب اس منصوبے کو 2017 میں مکمل کرنا چاہتی ہے اور منصوبے کو براہ راست وزیراعظم ہاؤس سے کنٹرول کیا جارہا ہے جب کہ منصوبے کی پشت پناہی 2 بھارتی خفیہ ایجنسیاں کررہی ہیں۔ ماہرین کے مطابق اس منصوبے سے بھارت کی جوہری صلاحیت کئی گناہ بڑھ جائے گی جب کہ منصوبہ چین اور بالخصوص پاکستان کے لیے انتہائی تشویش کا باعث بنے گا۔

واضح رہے کہ بھارت نے روس سے انتہائی جدید میزائل سسٹمز خریدنے کا بھی فیصلہ کیا ہے جس کی مالیت 39 کھرب روپے ہے۔